बिगर भाजप शासित राज्यांचे मुख्यमंत्री एकत्र येणार? राजकीय वर्तुळात चर्चांना उधाण

मुंबई : तेलंगणाचे मुख्यमंत्री चंद्रशेखर राव आज मुख्यमंत्री उद्धव ठाकरे आणि राष्ट्रवादी काँग्रेसचे अध्यक्ष शरद पवार यांची भेट घेणार आहेत. या भेटीसाठी ते मुंबईत येणार असून, दुपारी १ वाजता मुख्यमंत्र्यांच्या 'वर्षा' या शासकीय निवासस्थानी मुख्यमंत्री उद्धव ठाकरे आणि मुख्यमंत्री चंद्रशेखर राव यांची भेट होणार असून, बिगर भाजप शासित राज्यांचे मुख्यमंत्र्यांना एकत्र करण्याचा चंद्रशेखर राव यांचा प्रयत्न असल्याने सर्वांचं या भेटीकडे लक्ष लागून आहे.

बैठकीच्या आधी चंद्रशेखर राव यांनी मुख्यमंत्री उद्धव ठाकरे आणि त्यांचे पुत्र तेजस ठाकरे यांच्याशी चाय पे चर्चा केली.

के. चंद्रशेखर राव वर्षा बंगल्यावर दाखल झाले आहेत. त्यांच्या वाहनांच्या ताफा काही वेळापूर्वी वर्षा बंगल्यात दाखल झाला असून, ते लवकरच उद्धव ठाकरेंची भेट घेणार आहेत.

बॉलीवूड अभिनेता प्रकाश राजने मुख्यमंत्री के. चंद्रशेखर राव यांचं मुंबईत स्वागत केलं.

मिळालेल्या माहितीनुसार दुपारी १ वाजता 'वर्षा' बंगल्यावर पोहोचल्यानंतर चंद्रशेखर राव दुपारचं जेवण करणार असून, त्यानंतर दोन्ही मुख्यमंत्र्यांची भेट होणार आहे. मुख्यमंत्र्यांची बैठक झाल्यानंतर तेलंगणाचे मुख्यमंत्री सिल्वर ओक या निवासस्थानी जाऊन शरद पवार यांची भेट घेणार आहे. या भेटीकडे सध्या संपूर्ण राज्याचं लक्ष लागून आहे. तसंच देशाच्या राजकीय वर्तुळात देखील हा चर्चेचा विषय आहे.

मुख्यमंत्री उद्धव ठाकरेंनी राव यांना भोजनाचं आमंत्रण दिलं होतं. त्यानंतर राव मुंबईत येणार आहेत. बिगर भाजप शासित मुख्यमंत्र्यांची एकजूट करण्याचा राव यांचा प्रयत्न असून, देशातील भाजप आणि केंद्र सरकारच्या दबावाविरोधात बिगर भाजप शासित राज्यांचे मुख्यमंत्री एकत्र करण्याच्या हालचालींना वेग येणार असल्याची चिन्ह या भेटीमुळे निर्माण झाली आहेत.