मुंबई: परिवहन मंत्री अनिल परब (anil parab) यांना ED ने चौकशीसाठी नोटीस (notice) बजावली आहे. पण परिवहन मंत्री अनिल परब आज ईडीच्या चौकशीला हजर राहणार नाहीत. त्याऐवजी परिवहन विभागाच्या (transport dept) पथकासाठी वाहनांच्या लोकार्पणाचा कार्यक्रमाला हजर राहणार असल्याची माहिती आहे.

ED ने बजावलेल्या नोटीस मध्ये नेमक्या कोणत्या प्रकरणाची चौकशी करायची आहे, याचा स्पष्टं उल्लेख नाहीय. सूत्रांनी दिलेल्या माहितीनुसार, परिवहन मंत्री अनिल परब हे स्वत: आज ED च्या कार्यालयात चौकशीसाठी जाणार नाहीत. त्या ऐवजी अनिल परब यांचे वकिल आज ED च्या कार्यालयात जातील.

ED ने बजावलेल्या नोटीस संदर्भात कोणती चौकशी होणार आहे, याची माहीती ED च्या अधिकाऱ्यांना वकिलाकडून विचारण्यात येईल. त्यानंतर परिवहन मंत्री अनिल परब कायदेशीर सल्ला घेऊन पुढचा निर्णय घेणार आहेत. त्यामुळे आज परिवहन मंत्री अनिल परब ED च्या कार्यालयात जाणार नाहीत. परिवहन मंत्री अनिल परब यांचे पूर्व नियोजित कार्यक्रम आज मुंबईत होणार आहेत.

केंद्रीय मंत्री नारायण राणे यांच्या अटकेमध्ये अनिल परब भूमिका बजावत असल्याचे एका व्हिडीओमधून दिसले होते. तेव्हापासूनच, अनिल परब यांना टार्गेट करण्यात येईल, अशी चर्चा होती. अखेर दोन दिवसांपूर्वी अनिल परब यांना ED कडून नोटीस मिळाली.