देशातल्या महानगरांमध्ये होणाऱ्या वाहतूक कोंडीवर उपाय म्हणून रस्ते वाहतूक मंत्री नितीन गडकरी यांनी उडणाऱ्या बसचा पर्याय सुचवला आहे. आता ही बस कधी येणार, त्याची अंमलबजावणी कशी होणार, याबद्दल सर्वांनाच उत्सुकता आहे. त्याचसंदर्भात आता नितीन गडकरी यांनी सूचक वक्तव्य केलं आहे. (Nitin Gadkari on Skybus in India)

केंद्रीय रस्ते वाहतूक आणि महामार्ग मंत्री नितीन गडकरी यांनी या उडणाऱ्या बसबद्दल माहिती दिली आहे. एबीपी माझा या वाहिनीला दिलेल्या मुलाखतीमध्ये त्यांनी याविषयी भाष्य केलं आहे. बंगळुरूमध्ये या स्कायबसचा अभ्यास सुरू असल्याचं नितीन गडकरी यांनी सांगितलं आहे. ज्या शहरात रस्ते वाढवता येत नाहीत, जमिनीसंदर्भातल्या समस्या निर्माण होतात, अशा शहरांत या स्कायबसचा पर्याय चांगला ठरेल. अशाच पद्धतीची स्कायबस फिलिपिन्समध्ये सुरू आहे. भारतातही त्याच धर्तीवर स्कायबस सुरू करण्याचा विचार नितीन गडकरी यांनी मांडला आहे.

आयटीपार्क म्हणून ओळखल्या जाणाऱ्या बंगळुरूमध्ये ही स्कायबस सुरू करण्याचा विचार असून केंद्रीय रस्ते वाहतूक मंत्रालयाने या उपायाबद्दल विचार करण्यास सुरूवात केली आहे. याप्रकरणी आंतरराष्ट्रीय तज्ज्ञांचं मार्गदर्शन घेतलं जाईल, तसंच तीन महिन्यांत त्यांचा अहवाल मिळणार आहे, अशी माहिती नितीन गडकरी यांनी दिली आहे. या अहवालानंतर या स्कायबसबाबत पुढचा विचार करता येणार आहे.