Weather Update Maharashtra: राज्याच्या काही भागात उन्हाचे चटके जाणवत असतानाच, पावसासाठी अनुकूल वातावरण निर्माण झालं आहे. मध्य महाराष्ट्रासह मराठवाड्यात पुढील दोन दिवस तुरळक ठिकाणी पावसाची शक्यता भारतीय हवामानशास्त्र विभागाने वर्तविली आहे. तर विदर्भातही पुढील दोन दिवस तुरळक ठिकाणी मेघगर्जनेसह विजांचा कडकडाट आणि गारा पडतील, असा इशाराही हवामानशास्त्र विभागाने दिला आहे.

राज्यात सध्या ढगाळ वातावरणामुळे उन्हाचा कडाका काहीसा कमी जाणवत आहे. मध्य महाराष्ट्र आणि मराठवाड्यात तुरळक ठिकाणी वादळी वाऱ्यासह रविवारी (ता. ७) पावसाचा इशारा, तर सोमवारी (ता. ८) विदर्भ आणि मराठवाड्यात तुरळक ठिकाणी गारांचा पाऊस पडेल, असा अंदाज हवामानशास्त्र विभागाने वर्तविला आहे.

राज्यात शनिवारी सोलापूरमध्ये ४२.४ अंश सेल्सिअस अशा उच्चांकी तापमानाची नोंद झाली आहे. चंद्रपूर, यवतमाळ येथे तापमानाचा पारा ४२ अंश सेल्सिअसच्या पुढे होता. तर मराठवाड्यातील परभणी, नांदेड यांसह विदर्भातील अकोला, अमरावती, ब्रह्मपुरी, नागपूर, वाशीम, वर्धा येथे तापमानाचा पारा ४० अंश सेल्सिअसपेक्षाही अधिक होता.

पुण्यात बुधवारी पावसाची शक्यता

पुण्यात रविवारी (ता. ७) आणि सोमवारी (ता. ८) आकाश मुख्यत: निरभ्र राहण्याची शक्यता आहे. तर गुढीपाडव्याच्यादिवशी (ता.९) आकाश अंशत: ढगाळ राहील. मात्र, बुधवारी (ता.१०) अंशत: ढगाळ वातावरणासह हलक्या स्वरूपाचा पाऊस पडण्याची शक्यता आहे, असा अंदाज भारतीय हवामानशास्त्र विभागाने वर्तविला आहे. कोरेगाव पार्क येथे शनिवारी ४१ अंश सेल्सिअस तापमानाची नोंद झाली. तर लोहगाव, चिंचवड, लवळे आणि मगरपट्टा येथे ४० अंश सेल्सिअस तापमान नोंदविले गेले.

काही भागात ऑरेंज तर काही भागात यलो अलर्ट

नागपूर, गोंदिया, यवतमाळ या ठिकाणी तुरळक पावसाचा अंदाज वर्तवण्यात आला असून या ठिकाणी यलो अलर्ट देण्यात आला आहे. तर चंद्रपूर आणि गडचिरोलीमध्ये गारपीट आणि वादळी वाऱ्यासह मुसळधार पावसाती शक्यता वर्तवण्यात येत आहे. अकोल्यात विजांच्या गडगडाटासह पावसाची शक्यता आहे.