मुंबई : 'इंडियन बॉडीबिल्डींग अॅण्ड फिटनेस फेडरेशन'चे (Indian Body Building And Fitness Federation – IBBFF) सचिव संजय मोरे यांनी 'मि. युनिव्हर्स' स्पर्धेच्या नावाखाली खेळाडूंची फसवणूक केली असून नोंदणी शुल्काच्या रूपाने कोट्यवधी रूपयांचा घोटाळा केल्याचा गंभीर आरोप महिला शरीरसौष्ठवपटू हर्षदा पवार, श्रद्धा आनंद आणि मेनका भाटिया यांनी केला आहे.

स्पर्धेदरम्यान संस्थेच्या पदाधिकाऱ्यांनी अपमानास्पद वागणूक आणि गैरवर्तन केल्याचा आरोपही या महिला खेळाडूंनी केला आहे. याबाबत तक्रार करणार असल्याचेही त्यांनी सांगितले. जागतिक दर्जाची मि. युनिव्हर्स स्पर्धा भारतात होत असल्याचे या महिलांना सांगण्यात आले होते. त्यांनी स्पर्धेचे शुल्क म्हणून १५ हजार रुपये संस्थेकडे जमाही केले. प्रचंड मेहनत घेतली.

फाइव्ह स्टार हॉटेलमध्ये निवासाची व्यवस्था केली जाणार असल्याचे सांगण्यात आले होते. प्रत्यक्षात बालेवाडीला पोहोचल्यावर एका सामान्य खोलीत या महिलांना राहावे लागले. जेवणाचा खर्चही स्वत:लाच करावा लागला. १५० देशांतील शेकडो खेळाडू स्पर्धेत उतरणार असल्याचे सांगण्यात आले होते. प्रत्यक्षात परदेशी खेळाडूंच्या नावाखाली ग्वाटेमाला आणि कझाकस्तानचे मोजके खेळाडू होते. ८०० पेक्षा अधिक खेळाडू भारतीयच होते.

स्पर्धेत सहभागी होणाऱ्या प्रत्येकाला सहभाग प्रमाणपत्र देण्यात येणार असल्यामुळे हौशी खेळाडूही सहभागी झाले होते. थोडक्यात संस्थेने १५ हजार रुपयांत आंतरराष्ट्रीय शरीरसौष्ठवपटू होण्याचे प्रमाणपत्रच खेळाडूंना विकून मोठा घोटाळा केला असल्याचा आरोप श्रद्धा आनंद यांनी केला आहे.

संघटनेने कुणालाही शुल्काची पावती दिली नाही. ऑनलाइन शुल्क भरणाऱ्यांना पैसे वैयक्तिक खात्यावर भरायला सांगितले. त्यामुळे संघटनेच्या या गैरव्यवहाराची चौकशी व्हावी. त्यांनी वितरित केलेले प्रमाणपत्र कुठेही ग्राह्य धरले जाऊ नये, अशी मागणी या महिलांनी केली आहे.

शरीरसौष्ठव महासंघाचे सरचिटणीस सुरेश कदम यांनी महिला खेळाडूंना पाठिंबा दर्शवला आहे. तसेच संजय मोरे यांच्या डॉक्टर पदवीबाबतही शंका उपस्थित केली आहे.