Actress Veena Kapoor found alive : काही दिवसांपूर्वीच बातमी आली होती की अभिनेत्री वीणा कपूर यांच्या मुलाने त्यांची हत्या केली आहे. बोललं गेलं होतं की त्यांच्या ४३ वर्षीय मुलाने त्यांची हत्या करून त्यांच्या मृत शरीराला नदीत फेकून दिलं. पण वीणा कपूर जिवंत आहेत हे मोठं सत्य समोर आलं आहे. त्यांनी आपल्याविषयी अतिशय घाणेरड्या पद्धतीनं पसरवलेल्या अफवेवर दुःखं व्यक्त करत याविषयी मुंबईत दिंडोशी पोलिस ठाण्यात तक्रार दाखल केली आहे.(Actress Veena Kapoor found alive, complaint register against her death rumor)

वीणा कपूर यांच्या हत्येशी जोडलेलं नेमकं प्रकरण काय आहे,चला जाणून घेऊया. मुंबईच्या जुहू विभागात ही हत्या झाल्याचं समोर आलं होतं. ज्या महिलेची हत्या झाली तिचं नाव वीणा कपूर होतं. तिच्या मुलाचं नाव सचिन कपूर होतं ज्यानं तिला मारुन तिचा मृतदेह नदीत फेकून त्याची विल्हेवाट लावली होती. पण एकसारखे नाव असल्या कारणाने कन्फ्यूजन झाले आणि ती मृत महिला म्हणजे दुसरी कोणी नसून अभिनेत्री वीणा कपूर आहे ही बातमी वाऱ्यासारखी पसरली. लोकांनी देखील सोशल मीडियावर अभिनेत्री वीणा कपूर यांचे फोटो पोस्ट करत त्यांना श्रद्धांजली वाहण्यास सुरुवात केली.

लोकांनी फक्त वीणा कपूर यांना श्रद्धांजली वाहिली नाही तर त्यांच्या मुलाला देखील खूप वाईट पद्धतीनं सुनावलं. आता अभिनेत्री वीणा कपूर यांनी या प्रकरणात काही अज्ञात लोकांविरोधात गुन्हा दाखल केला आहे. पोलिसांनी यासंदर्भात तपास सुरु केला आहे. वीणा कपूर यांनी आपल्या तक्रारीत म्हटलं आहे की,त्यांच्या मृत्यूची खोटी बातमी पसरवली गेली. आपल्या अजूनही लक्षात येत नाही हे कोणी आणि का केलं आहे. वीणा कपूर यांनी सांगितलं आहे की,त्या जिवंत आहेत. तरीदेखील अशा बातम्या पसरवल्या जात आहेत. त्यांच्या निधनाच्या काही पोस्ट देखील व्हायरल केल्या गेल्या असं त्या म्हणाल्या.

एका इंग्रजी वृत्तपत्राशी यासंदर्भात संवाद साधताना त्या म्हणाल्या,''माझ्या मृत्यूची बातमी व्हायरल झाल्यानं मला काम मिळणं बंद झालं आहे आणि याचा मला खूप मनःस्ताप देखील झाला आहे. यामुळे मी माझ्या कामावर देखील लक्ष केंद्रित करू शकत नाही''. वीणा कपूर पुढे म्हणाल्या,''मी जिवंत आहे आणि माझ्या मुलानं मला मारलेलं नाही''. तर त्यांचा मुलगा अभिषेक चड्ढानं देखील स्पष्टिकरण यासंदर्भात दिलं आहे.

अभिषेक म्हणाले की, ''मला खूप फोन आणि मेसेजेस आले. प्रत्येकजण मी आईला मारलं का हेच त्यात मला विचारत होता. ही बातमी ऐकून आपल्याला धक्का तर बसलाच आहे आणि आपण आजारी पडल्याचं देखील अभिषेक म्हणाले. आपलं आपल्या आईवर खूप प्रेम आहे आणि हा विचार आपण स्वप्नातही करू शकत नाही''.

अभिनेत्री वीणा कपूर यांची हत्या झाल्याचं समोर येताच प्रसिद्ध अभिनेत्री नीलू कोहली यांनी देखील त्यावर दुःख व्यक्त केलं होतं. पण आता सगळं कन्फ्यूजन क्लीअर झालं आहे. अभिनेत्री वीणा कपूर जिवंत आहेत आणि चांगल्या देखील आहेत. पण आपल्याविषयी पसरलेल्या चुकीच्या बातम्यांनी मात्र त्यांना भलताच ताप झाला आहे.