बॉलीवूड अभिनेत्री अदा शर्मा(Adah Sharma) नेहमीच तिचे अतरंगी फोटो-व्हिडीओ सोशल मीडियावर पोस्ट करीत चाहत्यांचं मनोरंजन करताना दिसते. तिचा हा अतरंगीपण जोपर्यंत तिच्यापर्यंत होता तोपर्यंत ठीक होता,पण तिनं त्याच्या सीमा ओलांडत आता थेट दिवंगत गायक-संगीतकार बप्पी लाहिरी (Bappi Lahiri) यांचा फोटो पोस्ट करत तो अतरंगीपणा करुन दाखवलाय. बरं,नुसतं फोटो पोस्ट करुन थांबली नाही त्यावरनं मस्करी करीत नेटकऱ्यांना एक सवालही केला. त्यामुळे सध्या अदा शर्मा ट्रोल होत आहे. अदा शर्मानं नेमंक केलंय काय हा प्रश्न आपल्या वाचकांच्या मनात नक्कीच पडला असेल.

तिनं आपल्या फेसबूक अकाऊंटवर एक फोटो कोलाज शेअर केला आहे. ज्यात एका बाजूला 'गोल्डमॅन' च्या पेहरावात आपले लाडके गायक-संगीतकार बप्पी लाहिरी दिसत आहेत, तर दुसऱ्या बाजूला अदा दिसतेय. तिनं थेट बप्पी लाहिरी यांच्यासारख्याच अंगठ्या आपल्या हातातील बोटात घातल्या आहेत. फोटोतील त्यांच्या पोझसारखी हुबेहूब पोझ तिनं दिली आहे,आणि विचारलंय की,''कोणी अधिक चांगली ज्वेलरी घातली आहे?'' म्हणजे तिनं तिच्या फोटोला कॅप्शन दिलंय की,''Who wore it better?''. तिच्या या पोस्टवर नेटकरी मात्र भडकलेयत. अनेकांनी तिला फटकारलेलं दिसून येतंय. कुणी म्हणालंय,'हे तू चुकीचं केलं आहेस', तर कुणी म्हणालंय,'स्वतःची तुलना त्या दिग्गज व्यक्तीशी करू नकोस'. तर कुणी लिहिलंय,'तु हा फोटो पोस्ट करून बप्पी लाहिरी यांचा अनादर केला आहेस. कुणाच्या निधनानंतर ही अशी हास्यास्पद गोष्ट करणं तुला योग्य वाटतं का,लाज नाही वाटली हे करताना?'....

काही दिवसांपूर्वीच गायक-संगीतकार बप्पी लाहिरी यांचे वयाच्या ६९ व्या वर्षी प्रदीर्घ आजारानं निधन झालं. मुंबईतील एका रुग्णालयात त्यांनी अखेरचा श्वास घेतला. बप्पी लाहिरी यांना ज्वेलरी परिधान करण्याची आवड होती. त्यांना लाडानं सगळे 'गोल्डमॅन' देखील म्हणायचे. त्यांच्याविषयी,त्यांनी बॉलीवूडमध्ये आणलेल्या डिस्को या ट्रेंडविषयी अनेकांना कुतूहल आहे. आज त्यांच्या निधना नंतरही त्यांची गाणी रसिकांच्या मनावर राज्य करत आहेत. त्यामुळे सिनेमात फार काही कमाल न दाखवणाऱ्या अदानं त्यांच्याविषयी अशी विनोदी पोस्ट करून काहीतरी बरळणं लोकांना पटलं नाही आणि त्यांनी तिला धारेवर धरलं. अदानं २००८ मध्ये '१९२०' या हॉरर चित्रपटातून बॉलीवूडमध्ये प्रवेश केला होता.