अमिताभ बच्चन (Amitabh Bachchan) सोशल मीडियावर चांगलेच सक्रिय असतात. ते आपल्या वैयक्तिक आयुष्यातल्याही खूप सुंदर सुंदर पोस्ट शेअर करीत असतात. कधी एखादी भावूक करणारी कविता तर कधी घराच्या अंगणाचा दर्शनीय भाग,कधी घरातील त्यांचा आवडता म्युझिकल कोपरा तर कधी त्यांच्या शुटिंगचा एखादा फोटो असं काही ना काही खूप इंट्रेस्टिंग अशा स्टोरीज ते इन्स्टाग्राम किंवा ट्वीटरवर पोस्ट करीत असतात. त्यांचे चाहतेही त्यांच्या या पोस्ट पाहण्यासाठी उत्सुक असतात. त्यांच्या पोस्टवर त्यांच्या चाहत्यांनी केलेल्या भरभरून कमेंट्स हा त्याचा दाखला म्हणता येईल.

आज भारताचा ७३ वा प्रजासत्ताक दिन आपण साजरा करीत आहोत. भारतानं स्वातंत्र्याचं ७५ वं वर्ष साजरं केल्यानंतर हा प्रजासत्ताक दिन तसा विशेषच म्हणावा लागेल समस्त भारतीयांसाठी. दरवर्षीप्रमाणे यावर्षीदेखील प्रजासत्ताक दिन सप्ताह साजरा केला जाणार आहे तो २३ जानेवारी ते ३० जानेवारीपर्यंत. अनेक बॉलीवूड कलाकारांनी देखील सोशल मीडिया पोस्टद्वारे प्रजासत्ताक दिनाच्या शुभेच्छा दिल्या आहेत. आता यामध्ये अमिताभ बच्चन यांनीही प्रजासत्ताक दिनानिमित्त एक पोस्ट केली आहे. त्यांनी आपला एक फोटो पोस्ट केलाय. पण त्यावरून त्यांना आजच्या खास दिनी ट्रोल व्हावं लागलं आहे. काय आहे ती पोस्ट?

अमिताभ बच्चन यांनी त्यांच्या इन्स्टाग्राम अकाऊंटवर प्रजासत्ताक दिनाच्या शुभेच्छा देत एक फोटो शेअर केला आहे. या फोटोमध्ये त्यांनी झेंड्याच्या रंगांप्रमाणे दाढी आणि मिशी रंगवल्याचे दिसत आहे. हा फोटो शेअर करत त्यांनी ‘प्रजासत्ताक दिनाच्या खूप खूप शुभेच्छा’ असे कॅप्शन दिले आहे. सध्या सोशल मीडियावर अमिताभ बच्चन यांचा हा फोटो व्हायरल झाला आहे. पण या फोटोवर त्यांना खूप मिश्र प्रतिक्रिया आल्या आहेत. काही सेलिब्रिटींनी स्माईली पोस्ट केली आहे. त्यात कपिल शर्मा(Kapil Sharma) आणि बिग बी यांची मोठी मुलगी श्वेता नंदाचं नाव घेता येईल. काही चाहत्यांनीही हसून या पोस्टची प्रशंसा केली आहे. पण काहींना मात्र ही पोस्ट खटकली आहे. एका ट्रोलरने म्हटलं आहे,''तुमच्याकडून अशा पोस्टची अपेक्षा नव्हती. भारताचा झेंडा दाढीवर''. आता बिग बी यावर काय उत्तर देतात याकडे सगळ्यांचं लक्ष लागून आहे.