Bajrangi Bhaijaan 2 : 2015 साली आलेल्या 'बजरंगी भाईजान' सिनेमानं बॉक्सऑफिसवर जोरदार कमाई करण्यासोबतच भारत-पाकिस्तान हा विषय इतक्या सुंदरपणे पडद्यावर मांडला होता ज्यानं सगळ्यांची मनं जिंकली होती.

या सिनेमात सलमान खान,करिना कपूर,नवाझुद्दिन सिद्दीकी, ओम पुरी असे मातब्बर कलाकार होते. हर्षाली मल्होत्रा या लहान मुलीनं देखील आपल्या पहिल्याच सिनेमात सर्वांचे लक्ष वेधून घेतले होते.

हिंदू आणि मुसलमान या द्वंद्वात फसलेली एक लहान पाकिस्तानी मुलगी आणि तिला सुरक्षित ठेवण्यासाठी झटणारा हनुमान भक्त यांच्यातील नातं सिनेमात दाखवलं गेलं होतं. आता या सिनेमाचा सीक्वेल येतोय अशी चर्चा आहे.

यामध्ये कोण कोण असणार,हा सिनेमा कधी येईल,याची कथा काय असेल असे अनेक प्रश्न चाहत्यांच्या डोक्यात असताना आता या सीक्वेलसंदर्भात भलतंच काहीतरी कानावर पडत आहे. बातमी कळतेय की या सीक्वेलमध्ये करीना कपूर ऐवजी पूजा हेगडे सिनेमात दिसणार आहे. आता यात काय खरं आणि काय खोटं हे लवकरच कळेल.

मध्यंतरी बातमी होती की करीना कपूर खान बजरंगी भाईजानच्या सीक्वेलमध्ये दिसणार नाही. तिला दाक्षिणात्य अभिनेत्री पूजा हेगडे रिप्लेस करणार असल्याचं बोललं जात होतं. तसंच या सिनेमाचं नाव 'पवनपुत्र भाईजान असेल' हे देखील समोर आलं होतं.

आता अशी बातमी समोर आल्यानं करिनाच्या चाहत्यांना मात्र धक्का बसला होता. करीना सिनेमाचा महत्त्वाचा भाग होती आणि असं असताना तिला सीक्वेलमधून कसं बाजूला केलं असे अनेक प्रश्न निर्माण झाले.

हेही वाचा: नोकरदार असाल तर रोखीनंच घ्या कार

ईटाईम्सला एका सूत्राकडून मिळालेल्या बातमीच्या आधारे बोललं जात आहे की, सिनेमाचं टायटल 'पवनपुत्र..' असेल ही बातमी खरी आहे. पण बाकी सगळ्या अफवा आहेत. अजूनपर्यंत कोणती स्क्रिप्टच समोर आलेली नाही तर कलाकारांना रिप्लेस कसं केलं जाईल? सीक्वेल अद्याप कागदावरच आहे. प्रॉडक्शनच्या कोणत्याच कामाला सुरुवात झालेली नाही. अशामध्ये करीना कपूरला सिनेमातून बाहेर करण्याची बातमीच चुकीची आहे.

माहितीसाठी इथं सांगतो की, पूजा हेगडेला अद्याप इंडस्ट्रीत चांगला सूर गवसलेला नाही. तिचे अनेक बिग बजेट सिनेमे फ्लॉप झालेयत. ना साऊथमध्ये तिचं नाणं वाजलंय ना बॉलीवूडमध्ये. लवकरच ती आता सलमान सोबत 'किसी का भाई..किसी की जान' सिनेमात दिसणार आहे. हा सिनेमा २१ एप्रिलला रिलीज होत आहे. त्यानंतर कळेल प्रेक्षकांनी तिला पसंत केलं आहे की नाही..