Big Boss 4: बिग बॉस मराठीच्या घरातून नुकतीच मेघा घाडगे घराच्या बाहेर पडली असल्यानं आता घरातील सूत्र हळूहळू बदलू लागलीयत. मेघाचा ग्रुप आता आपली माणसं कमी होऊ लागल्यानं नवनवीन स्ट्रॅटेजी आखताना दिसत आहेत. त्यामुळे आता तेजस्विनीनं आपल्या ग्रुपला याबाबतीत हुशारीनं वागायचा सल्ला दिला आहे. मात्र हा सल्ला देताना तिनं घरातल्या दोन सदस्यांना नकळत टोला लगावला आहे. काय म्हणाली आहे तेजस्विनी? चला जाणून घेऊया सविस्तर.(Big Boss Marathi 4, Tejaswini Lonari discuss with her team.)

बिग बॉस मराठीच्या घरामध्ये तेजस्विनीचा ग्रुप आज दुसऱ्या ग्रुपबद्दल चर्चा करताना दिसणार आहे. ज्यामध्ये तेजस्विनी तिच्या टीमला सावध करणार आहे. काल मेघा घाडगेला घराबाहेर पडावे लागले आणि त्यामुळे घरातील दुसऱ्या ग्रुपची समीकरणं तेजस्विनीला बदलताना दिसत आहेत, ज्याबद्दल ती ग्रुपला सल्ला देणार आहे. विशेषतः योगेशला.

मेघा घाडगे घरातून बाहेर पडली याचा संदर्भ देत तेजस्विनी म्हणताना दिसेल की, ''काल जे झालं त्यानंतर लगेच सगळे नीट बोलत आहेत. मला काही प्रॉब्लेम नाही, मी तर तशीही पहिल्या दिवसापासून सगळ्यांशी नीटच बोलते आहे इथे माझी लॉयल्टी मी दाखवली आहे. ते नीट बोलले तरी भारावून जाऊ नका. फक्त काळजी घ्या, त्यांची ताकद कमी होतं आहे म्हणून त्यांना आता लोकं पण हवी आहेत. त्यांच्या ग्रुपमध्ये बसायला, टवाळक्या करायला. त्यात तुझा नंबर पहिला आहे (योगेश) emotionally भारावून जाण्यात तू पहिला येतोस''. हे असं बोलून एकार्थानं तेजस्विनी योगेशला मेघा घाडगे नंतर स्वतःला घराबाहेर जाण्यासाठी टार्गेट करून घेऊ नकोस असा नकळत सल्ला देताना दिसेल.

अमृता धोंगडे यावर म्हणताना दिसेल, 'त्या दोघांचे (किरण आणि विकास) म्हणणे आहे प्रसादसाठी त्यांनी आपल्याशी वैर घेतले'. पण यावर तेजस्विनी किरण माने आणि विकासला टोला लगावत म्हणताना दिसणार आहे, या दोघांचे काहीच होणार नाही ते तसेच राहणार आहेत. मेघा घाडगे घरातून बाहेर पडल्यावर घरातील सदस्यांच्या वागणुकीत मोठे बदल होताना दिसून येणार,आणि त्यामुळे आजचा एपिसोड बदलेल्या सूत्रांची,व्यूहरचनेची झलक दाखवणारा ठरला असेल.