एकीकडे अनेक सेलिब्रिटी हे कोरोनाप्रतिबंधक लस Vaccine घेण्यासाठी नागरिकांना आवाहन करत असताना दुसरीकडे अभिनेते विजय आनंद Bijay J Anand यांनी लस कधीच घेणार नसल्याचं म्हटलंय. कोरोनावर मात करण्यासाठी लसीकरण हाच सर्वोत्तम उपाय असल्याचं जगभरातील देशांनी मान्य केलं. देशातही वेगाने लसीकरण मोहीम राबवण्यात येत आहे. त्याविषयी जनजागृतीसुद्धा करण्यात येत आहे. असं असताना लसीकरण हा खूप मोठा घोटाळा असल्याचा दावा विजय आनंद यांनी केला आहे.

"मी दोन चित्रपट गमावले आहेत, ज्यांची शूटिंग लंडनमध्ये होणार होती. सर्बियामध्ये शूट होणारा मोठा वेब सीरिज प्रोजेक्टसुद्धा मी गमावला. दुबईत मला एका पुरस्काराने गौरविण्यात येणार आहे, पण मी तिथेही जाऊ शकत नाही. जरी माझ्या हातून काम निघून जात असेल, तरी मी लस टोचून घेणार नाही", असं ते म्हणाले.

विजय आनंद यांचा लसीकरणाला इतका तीव्र विरोध का आहे, याबद्दल ते म्हणाले, "माझ्यासाठी माझं शरीर हे मंदिर आहे आणि त्यात मी कोणत्याच केमिकल्सचा प्रवेश होऊ देणार नाही. मला अभिनयसुद्धा करायचे नाहीये. मी सर्व ऑफर्स नाकारल्या आहेत. माझ्या १४ वर्षांच्या मुलीला चित्रपटात पहिल्यांदा भूमिका मिळाली आहे. माझं आणि पत्नी सोनाली खरेचं लसीकरण झालं नसल्याने तिला एकटीला लंडनला शूटिंगसाठी जावं लागत आहे. लसीकरणाबद्दल आमचा निर्णय ठाम आहे. लसीकरणावरून राजकारण केलं जात असून इतिहासातील हा सर्वांत मोठा घोटाळा आहे, असं माझं मत आहे. या घोटाळ्यात मी माझं योगदान अजिबात देणार नाही."

अजय देवगण आणि काजोल यांच्या 'प्यार तो होना ही था' या चित्रपटात विजय आनंद यांनी भूमिका साकारली होती. अलीकडेच ते 'शेरशाह' या चित्रपटात झळकले होते. विजय हे प्रसिद्ध योग प्रशिक्षक असून जगभरात त्यांचे विद्यार्थी आहेत.