प्रसिद्ध भारतीय चित्रपट दिग्दर्शक, निर्माता आणि पटकथा लेखक महेश भट्ट यांच्या प्रकृतीबाबात एक मोठी बातमी समोर आली आहे. महेश भट्ट यांच्यावर नुकतीच हृदयाची शस्त्रक्रिया झाली आहे. त्यामुळे महेश भट्ट यांच्या प्रकृतीबाबत भट्ट कुटुंब चिंतेत आहे.

आलिया भट्टचे वडील महेश भट्ट यांच्यावर हृदयाची शस्त्रक्रिया झाल्याचं वृत्त आहे. महेश भट्ट यांची अँजिओप्लास्टी झाली आहे. गेल्या महिन्यात त्यांच्या हृदयाची तपासणी झाल्यानंतर लवकरच शस्त्रक्रियेची गरज भासू लागली.

'इटाईम्स'ने प्रसिद्ध केलेल्या वृत्तानुसार, महेश भट्ट यांचा मुलगा राहुल याने या बातमीची पुष्टी केली आहे. या आठवड्याच्या सुरुवातीला त्यांच्या वडिलांना रुग्णालयात दाखल करण्यात आले होते आणि त्यांच्या हृदयावर शस्त्रक्रिया करण्यात आली होती.

याविषयी बोलतांना तो म्हणाला, 'ऑल इज वेल दॅट एन्ड वेल. ते (महेश भट्ट) आता ठीक आहे आणि घरी परतले आहे. मी तुम्हाला अधिक तपशील देऊ शकत नाही कारण हॉस्पिटलमध्ये अनेक लोकांना जाण्याची परवानगी नव्हती.'

हेही वाचा: मेडिकल मॅनेजमेंटही हृदयविकारावर ठरु शकते उपाय

महेश भट्ट यांनी वयाच्या 26 व्या वर्षी 'मंजिलें और भी हैं' या चित्रपटाद्वारे त्यांनी दिग्दर्शनात पदार्पण केले. 1974 पासून चित्रपटाचे दिग्दर्शिन करण्यास सुरुवात केली. 1984 मधील 'सारांश' हा त्यांचा सर्वात लोकप्रिय चित्रपट होता, जो 14 व्या मॉस्को आंतरराष्ट्रीय चित्रपट महोत्सवात प्रदर्शित झाला होता.

आज महेश भट्ट यांची गणना बॉलिवूडमधील टॉप फिल्ममेकर्समध्ये केली जाते. त्याचे विशेष फिल्म्स नावाचे स्वतःचे प्रोडक्शन हाऊस देखील आहे. आता आगामी काळात त्याच्या अनेक चित्रपटांवर काम सुरु आहे. त्यामुळे ते लवकरच बरे होऊन पुनरागमन करतील, अशी आशा आहे.