Fu Bai Fu: झी मराठीवर काही कार्यक्रम गतकाळात असे होऊन गेलेयत ज्यांच्या विषयी अनेक वर्षानंतरही प्रेक्षकांमध्ये क्रेझ दिसून आली आहे. त्या कार्यक्रमांचे केवळ मराठी नाही तर अमराठी प्रेक्षकही चाहते होते. त्यातलाच एक कार्यक्रम म्हणजे 'फू बाई फू'. एक काळ होता जेव्हा अनेक नवख्या विनोदीवीरांना घेऊन केलेल्या फू बाई फू कार्यक्रमानं वाहिनीवरील अनेक टॉपच्या मालिकांना आव्हान दिलं होतं. टीआरपी च्या स्पर्धेत 'फू बाई फू' नं आपली दहशत निर्माण केली होती असं म्हटलं तर अतिश्योक्ती ठरू नये.

अनेक सिझन या कार्यक्रमानं गाजवले. फू बाई फू च्या जुन्या सिझनमध्ये चमकलेले कलाकार आज स्टार्स आहेत. तब्बल ९ वर्षांनी हा कार्यक्रम पुन्हा वाहिनीनं आणला तेव्हा चाहते भलतेच खूशीत होते. कार्यक्रमाचा मोठा गाजावाजा केला गेला. पण आता बातमी समोर येतेय की कार्यक्रम अर्ध्यावरच गुंडाळला जातोय. काय आहे नेमकं कारण? चला जाणून घेऊया सविस्तर.

ओमकार भोजने, भूषण कडू, सागर कारंडे, नेहा खान, पंढरीनाथ कांबळे,प्राजक्ता हनमकर,कमलाकर सातपुते,माधवी जुवेकर..अशा अनेक विनोदात मुरलेल्या कलाकारांना घेऊन तब्बल ९ वर्षांनी फू बाई फू कार्यक्रम झी मराठीनं आणला,पण अवघ्या महिनाभरात कार्यक्रमाला गुंडाळलं जातंय याची बातमी समोर येतेय. झी मराठीवर नव्यानं येऊ घातलेल्या दोन मालिका आणि फू बाई फू ला म्हणावा तसा मिळत नसलेला प्रतिसाद ही कारणं समोर येत आहेत. या कार्यक्रमाला उमेश कामत आणि निर्मिती सामंत परिक्षक म्हणून लाभल्या होत्या,तर वैदेही परशुरामी कार्यक्रमाचं सूत्रसंचालन करत होती.

फू बाई फू हा कार्यक्रम तब्बल ९ वर्षांनी झी मराठी वाहिनीवर ३ नोव्हेंबर,२०२२ रोजी सुरू झाला होता. पण बोललं जात आहे की ८ डिसेंबर,२०२२ रोजी कार्यक्रमाचा शेवटचा भाग शूट होतोय. म्हणजे अवघ्या एक-दीड महिन्यात फू बाई फू प्रेक्षकांचा निरोप घेताना दिसत आहे. फू बाई फू च्या इतिहासात हे पहिल्यांदाच घडतेय. त्यात अनेक मातब्बर कलाकार आपले जुने काही शो सोडून फू बाई फू मध्ये आले होते ज्याची वादग्रस्त चर्चा रंगली होती. सध्या तरी म्हणावा तसा टीआरपी कार्यक्रमाला मिळत नाही म्हणून कार्यक्रम गुंडाळला गेला असावा असंच कारण समोर येत आहे.