'पुष्पा'(Pushpa-The Rise) सिनेमाचा फिव्हर काही कमी होण्याचं नाव घेत नाही. गेल्या वर्षात प्रदर्शित झालेला सिनेमा यावर्षातही आपला दबदबा कायम राखून आहे हे प्रकर्षानं दिसत आहे. सिनेमानं आतापर्यंत ३०० कोटींची कमाई केली आहेच. शिवाय सोशल मीडियावर या सिनेमातील संवाद आणि 'सामी-सामी' तसंच 'ऊ-अंटावा' गाण्यांवरील व्हिडीओ रीलचा तर नुसता धो-धो पाऊस पडताना दिसत आहे. बरं,सेलिब्रिटींपासून सर्वासामान्यांपर्यत साऱ्यांनीच याचा आनंद घेतलेला आपण पाहिला. आणि हो,नेहमीच बॉलीवूडशी जवळचं नातं जपलेल्या क्रिकेटवीरांनीही या सिनेमातील संवाद आणि गाण्रयांवर व्हिडीओ रील पोस्ट करून धमाल केलेली आपण साऱ्यांनीच पाहिली असेल. 'पुष्पा-द राइज' सिनेमातील अल्लु अर्जुन(Allu Arjun),रश्मिका मंदाना(Rashmika Mandana) या कलाकारांसोबत केवळ एक आयटम सॉंग करणारी समंथा रुथ प्रभूही चाहत्यांच्या मनाला भावली आहे.

आता अभिनेते अनुपम खेर(Anupam Kher) यांनी त्यांच्या सुपर-डुपर हीट 'हम आपके है कौन' सिनेमातील एका गाण्याला 'ऊ-अंटावा' या पुष्पातील गाण्याच्या न्यू व्हर्जंन मध्ये परावर्तित करून तो व्हिडीओ सोशल मीडियावर पोस्ट केला आहे. 'हम आपके है कौन' मधील सगळीच गाणी सुपरहीट. त्यातीलच 'आज हमारे दिल मै' या गाण्याचे बोल या व्हिडीओत अचानक 'ऊ-अंटावा' होताना पहायला मिळतात. ते फारच मजेदार आहे. यानिमित्तानं व्हिडीओ कॅप्शन देताना अनुपम खेर यांनी दिवंगत अभिनेत्री रिमा यांचं स्मरण केलेलं दिसत आहे. त्यांनी लिहिलंय,'समधनजी इज बॅक'. या व्हिडीओवर नेटकरीही खूश झालेले दिसत आहेत. जुन्यावर नव्याचा मुलामा चढवताना कधीकधी गोष्टी फसतात पण इथे मात्र सुर उत्तम जुळले आहेत. शिवाय 'पुष्पा' फिव्हर आहेच अजुनही,सो कशाला कोण विरोधात बोलतंय. लोकांचं मनोरंजन झालं म्हणजे काम फत्ते.