हिंदी रियालीटी शो 'इंडियन आयडॉल १२' मधील स्पर्धक सध्या प्रेक्षकांचे मन जिंकत आहेत. या शोच्या विकेंडच्या विशेष भागत बॉलिवूडमधील प्रसिद्ध अभिनेता जॅकी श्रॉफने म्हणजेच 'जग्गू दादा'ने उपस्थिती लावली. यावेळी जॅकीला स्पेशल गेस्ट म्हणून शोमध्ये बोलवण्यात आले होते. जग्गू दादा या शोमध्ये मज्जा-मस्ती करताना दिसला. त्याचा हा मिश्कील अंदाज प्रेक्षकांच्या पसंतीस पडला. या शोमधील स्पर्धक आशिष कुलकर्णीने जॅकीच्या आयना चित्रपटातील 'गोरिया रे गोरिया रे' हे  गाणे सादर केले. 

शोमध्ये जॅकीने त्याच्या आयुष्यातील काही मजेदार किस्से सांगून प्रेक्षकांचे मनोरंजन केले. शोमध्ये आदित्य नारायणने जॅकीला एक खास व्हिडीओ दाखवला. या व्हिडीओमध्ये जॅकीच्या कुटुंबातील सदस्यांनी त्यांच्यासाठी खास मेसेज दिला. शोमध्ये जॅकी श्रॉफची पत्नी आयशा श्रॉफने जॅकीबद्दल एक खास आठवण सांगितली की,'तुम्हा सगळ्यांना हे जाणून आश्चर्य वाटेल की,  मी जेव्हा जॅकीला भेटले तेव्हा मी 13 वर्षाची होते. मी आणि जॅकी एका रेकॉर्डिंग स्टुडिओमध्ये भेटलो. तेव्हा आमचे फक्त 2 मिनीट बोलणे झाले होते. मग मी घरी येऊन माझ्या आईला सांगितले होते की, मी आज ज्या माणसाला भेटले त्याच्यासोबत लग्न करणार आहे.

राजपाल यादवची फिल्मी लव्हस्टोरी; शूटिंगसाठी परदेशात गेला अन्..

या भेटीच्या 3 वर्षानंतर मी पुन्हा जॅकींना पाहिले त्यानंतर आम्ही बोलायला सुरूवात केली. आम्ही बाहेर फिरायला सुरूवात केली. त्यांच्यासोबत लग्न करण्याचा माझा निर्णय बरोबर होता. मी स्वत:ला नशिबवान समजते की मला जॅकी नवरा म्हणून मिळाला. तो या जगातील सगळ्यात चांगला नवरा आहे.' 

हिंदी चित्रपट सृष्टीताल प्रसिद्ध अभिनेता टायगर श्रॉफने देखील आपल्या वडिलांसाठी शोमध्ये एक खास आठवण व्हिडीओमधून सांगितली. यावेळी टायगर म्हणाला,'सगळ्यात आधी शोमधील सर्व स्पर्धकांना त्यांच्या भविष्यासाठी शुभेच्छा. सगळ्या परिक्षकांना माझा नमस्कार. मी एवढच सांगू इच्छितो डॅड, मी तुमच्यावर खूप प्रेम करतो. आयुष्यात माझं एकच ध्येय आहे की मी प्रत्येक दिवशी तुम्हाला अभिमान वाटेल असं काही तरी करेन आणि मला वाटतं आहे की, मी असं करू शकत आहे'. हा संदेश ऐकून जॅकी भावुक झाला आणि त्याने इंडियन आयडॉलचे आभार मानले.