Jawan Box Office Collection Day 2: 'जवान'मधील शाहरुख खान आणि अॅटली यांची जादू सध्या सर्वत्र पहायला मिळत आहे. जवान या चित्रपटाला केवळ शाहरुखच्या चाहत्यांचाच नाही तर त्याच्या विरोधकांचाही चांगला प्रतिसाद मिळत आहे. दक्षिणेपासून ते बॉलिवूडपर्यंत सर्वच स्टार्स जवान आणि शाहरुखवर फिदा झाले आहे. या चित्रपटाने सोशल मीडियावर देखील वर्चस्व प्रस्थापित केलेलं आहे.

जवान सोशल मीडियावर ट्रेंड होत आहे. पहिल्या दिवशी जवान पाहिल्यानंतर बॉलिवूड आणि टॉलिवूड कलकारांनी देखील शाहरुखच्या कौतुकाचे पुल बांधले.

लोकांमध्ये जवान चित्रपटाची खुपच क्रेझ आहे. चित्रपटगृहात शाहरुखच्या एंट्रीवर फक्त टाळ्या आणि शिट्ट्या वाजत आहेत. जन्माष्टमीच्या मुहूर्तावर जवान सर्वत्र प्रदर्शित करण्यात आला. 'जवान'ने पहिल्याच दिवशी चांगला व्यवसाय केला. आता जवानच्या दुसऱ्या दिवसाचे कलेक्शन देखील समोर आले आहे.

पहिल्या दिवशी जबरदस्त ओपनिंग देणाऱ्या या चित्रपटाची कमाई दुसऱ्या दिवशी कमी झाली असली तरी या चित्रपटाने 100 कोटींच्या क्लबमध्ये प्रवेश केला आहे.

SACNILC ने दिलेल्या अहवालानुसार, जवानाने दुसऱ्या दिवशी 53 कोटी रुपयांचा गल्ला जमावला आहे. जवानने पहिल्या दिवशी 75 कोटींची कमाई करत सुपरहिट ओपनिंग दिली. या कमाईसोबतच हा चित्रपट बॉलिवूडचा सर्वाधिक कमाई करणारा चित्रपट ठरला आहे.

त्यामुळे आता दोन्ही दिवासाचे कलेक्शन पाहता जवानने आता 127.50 कोटींची कमाई केली आहे. वीकेंडला हे कलेक्शन नक्कीच वाढणार अशी अपेक्षा आहे.

जवान चित्रपटात शाहरुख दुहेरी भूमिकेत आणि 5 वेगवेगळ्या अवतारांमध्ये दिसत आहे. त्याने उत्तम अभिनय केला आहे. शाहरुख खानच्या दमदार अ‍ॅक्शन सीक्वेन्ससोबतच नयनताराचा आणि विजय सेतुपतीची खलनायकाची भूमिकाही 'जवान' चित्रपटाला सुपरहिट करण्यास मदत करत आहे त्यासोबत सान्या मल्होत्रा ​​देखील या चित्रपटाचा एक भाग आहे. या चित्रपटात दीपिका पदुकोण आणि संजय दत्तने चित्रपटात कॅमिओ केला आहे.