अभिनेता जॉन अब्राहमने (John Abraham) नुकताच आपला वाढदिवस साजरा केला. बॉलिवूडमधील यशस्वी अभिनेता म्हणून जॉनने स्वत:ची ओळख निर्माण केली असून त्याचा चाहतावर्गही मोठा आहे. जॉनने २००३ मध्ये 'जिस्म' या चित्रपटातून बॉलिवूडमध्ये पदार्पण केलं. त्याआधी त्याने मॉडेल म्हणून इंडस्ट्रीत आपला जम बसवला होता. बॉलिवूडमध्ये अनेक नवनव्या अभिनेत्यांची एण्ट्री होत असतानाच जॉनने मात्र आपलं वेगळं स्थान निर्माण केलंय. इतकंच नव्हे तर संपत्तीच्या बाबतीतही तो अनेक कलाकारांच्या पुढे आहे. (John Abraham's Net Worth)

'टाइम्स ऑफ इंडिया'ने दिलेल्या वृत्तानुसार, जॉन तब्बल ३४ दशलक्ष युएस डॉलर्स म्हणजेच जवळपास २५१ कोटींचा मालक आहे. १७ डिसेंबर १९७२ रोजी केरळमध्ये जॉनचा जन्म झाला. ४९ वर्षीय जॉनची सर्वाधिक कमाई ही चित्रपटांमधूनच होते. एका चित्रपटासाठी तो जवळपास सहा ते सात कोटी रुपये मानधन घेतो.

अभिनयाशिवाय जॉन अनेक ब्रँड्सचा अॅम्बेसेडर असून त्यातून त्याची बरीच कमाई होते. ब्रँड एंडोर्समेंटसाठी तो जवळपास एक कोटी रुपये मानधन घेतो. इतकंच नव्हे तर त्याचं स्वत:चं प्रॉडक्शन हाऊससुद्धा आहे. त्याच्या प्रॉडक्शन हाऊसने 'विकी डोनर' आणि 'मद्रास कॅफे' या चित्रपटांची निर्मिती केली आहे. जॉन फिटनेस फ्रीक म्हणून ओळखला जातो. त्याला स्पोर्ट्सची खूप आवड असून इंडियन सुपर लीगमधील नॉर्थईस्ट युनायटेड एफसी या फुटबॉल संघाचा तो मालक आहे.

बॉलीवूड इंडस्ट्रीतील सर्वाधिक कमाई करणाऱ्या अभिनेत्यांपैकी एक जॉन असून त्याचं वार्षिक उत्पन्न जवळपास १५.५ कोटी रुपये इतकं असून दरवर्षी हा आकडा वाढतोय. तो लवकरच 'अटॅक' या अॅक्शन थ्रिलर चित्रपटातून प्रेक्षकांच्या भेटीला येणार आहे. हा चित्रपट २८ जानेवारी २०२२ रोजी प्रदर्शित होणार आहे. त्याचा 'सत्यमेव जयते २' हा चित्रपट नुकताच प्रदर्शित झाला होता. यामध्ये त्याने तिहेरी भूमिका साकारल्या होत्या.