Kartik aryan viral video On MP Assembly Elections 2023:

बॉलिवूड अभिनेता कार्तिक आर्यन हा नेहमी कोणत्या ना कोणत्या कारणाने चर्चेत असतो. कधी त्याच्या चित्रपटांची तर कधी त्याच्या लव्ह लाईफची चर्चा होत असते. खुप कमी कालावधीत त्याने बॉलिवूडमधील सर्वोत्कृष्ट अभिनेत्यांमध्ये आपलं स्थान निर्माण केलं आहे. मात्र यावेळी तो वेगळ्याच कारणामुळे चर्चेत आला आहे. त्याचा एक व्हिडिओ सध्या सोशल मिडियावर व्हायरल होत आहे.

17 नोव्हेंबर रोजी होणाऱ्या मध्य प्रदेश निवडणुकीत कार्तिक काँग्रेस पार्टी आणि त्याचे उमेदवार कमलनाथ यांना पाठिंबा देत असून काँग्रेस पार्टीचा प्रचार करत असल्याचा एक व्हिडिओ व्हायरल होत होता आता कार्तिकने या बाबत स्पष्टीकरण देत त्याची बाजू मांडली आहे.

कार्तिक आर्यनने त्याच्या अधिकृत अकाऊंटवर एक पोस्ट शेअर करत याबाबत माहिती दिली आहे. या पोस्टमध्ये त्याने मध्य प्रदेश निवडणुकीत काँग्रेसच्या पाठिंबा दिल्याच्या वृत्तावर मौन सोडत प्रतिक्रिया दिली आहे.

त्याने एक व्हिडिओ क्लिप शेअर केली आहे. ज्यात तो OTT प्लॅटफॉर्म Disney Plus Hotstar चे प्रमोशन करत होता. ही पोस्ट शेअर करताना त्याने कॅप्शनमध्ये लिहिले - ही Disney Plus Hotstar ची खरी जाहिरात आहे, बाकी सर्व खोटे आहे.

त्याचे झालं असे की, कार्तिकने मोबाइल फोनवर ICC पुरुष विश्वचषक OTT प्लॅटफॉर्म डिस्ने प्लस हॉटस्टारवर विनामूल्य स्ट्रीमिंग संदर्भात एक जाहिरात केली होती. जी सुमारे महिनाभरापूर्वी प्रदर्शित झाली होती.

मात्र या जाहिरातीसोबत छेडछाड करण्यात आली. डब केलेल्या ऑडिओ आणि व्हिडिओसह यात मध्य प्रदेशात होणाऱ्या निवडणुकीसाठी कार्तिक आर्यन काँग्रेसला पाठिंबा देत असल्याचे दाखवण्यात आलं होतं.

त्यामुळे कार्तिक आर्यनने निवडणूकीत काँग्रेसला समर्थन दिल्याच्या चर्चा सोशल मिडियावर सुरु झाल्या होत्या. मात्र आता कार्तिकने ही पोस्ट शेअर करत त्याचा आणि कोणत्याही राजकीय गटाचा काही संबंध नसल्याचे स्पष्ट केले आहे.

कार्तिक आर्यनच्या वर्कफ्रंटबद्दल बोलायचे झाले तर, कार्तिक आर्यन हा कबीर खानच्या चंदू चॅम्पियन या चित्रपटात दिसणार आहे. याशिवाय तो त्याच्या 'भूल भुलैया 3' या हिट चित्रपटातही काम करणार आहे.