काँग्रेस नेते राहुल गांधी यांचे संसद सदस्यत्व संपुष्टात आल्यापासून देशात राजकीय वातावरण तापले आहे. काँग्रेस आणि भाजपमध्ये शाब्दिय युद्ध छेळले आहे. काँग्रेस सातत्याने भाजपवर हल्लाबोल करत आहे. गुरुवारी सुरत न्यायालयाने काँग्रेस नेते राहुल गांधी यांना मानहानीच्या प्रकरणात दोषी ठरवले आणि त्यांना दोन वर्षांची शिक्षाही सुनावली.

मात्र, सुनावणीदरम्यानच न्यायालयाने त्यांना जामीन मंजूर केला. मात्र लोकसभा अध्यक्षांनी राहुल गांधींची खासदारकी रद्द केली. यावर आता अभिनेत्री केतकी चितळेने देखील भाष्य केले आहे.

राहुल गांधी यांच्यावर कारवाई झाल्यानंतर केतकी चितळेने इंस्टाग्रामवर एक स्टोरी पोस्ट केली आहे. यामध्ये तिने राहुल गांधी यांच्यावर झालेली कारवाई आणि राष्ट्रवादी काँग्रेसचे अध्यक्ष शरद पवार यांच्यासंदर्भात फेसबुकवर शेअर केलील्या पोस्टमुळे तिच्यावर झालेली कारवाई, या दोन गोष्टींचा संदर्भ जोडला आहे.

काही लोकांच्या मते राहुल गांधी यांना घाबरले म्हणून मानहानीचा खटला दाखल केला. या लॉजिकने लोक मलाही घाबरले होते का,?, असा प्रश्न केतकी चितळेने उपस्थित केला आहे.

केतकी चितळे सोशल मीडियावर सतत सक्रिय असते. राष्ट्रवादी काँग्रेसचे अध्यक्ष शरद पवार (Sharad Pawar) यांच्यावर आक्षेपार्ह शब्दात टीका केल्यामुळे तिला ठाणे पोलिसांनी ताब्यात घेतले होते. केतकीने केलेल्या पोस्टमध्ये "ऐंशी झाले आता उरक, वाट पाहतोय नरक" असे शब्द वापरले होते, या आक्षेपार्ह पोस्टनंतर राष्ट्रवादी काँग्रेसने आक्रमक भूमिका घेतली होती.

या प्रकरणात केतकीला तुरूंगात देखील जावे लागले होते. मराठी मनोरंजन विश्वामध्ये नेहमीच आपल्या परखड आणि आक्रमक स्वभावामुळे आणि वादग्रस्त वक्तव्यामुळे केतकी चितळे चर्चेत असते.