बॉलीवूडमध्ये(Bollywood) असे कितीतरी कपल्स आहेत ज्यांचे लग्नसोहळे(Marraige Ceremony) गाजले. एकमेकांच्या प्रेमात आकंठ बुडालेले फरहान-शिबानी हे देखील त्यापैकी एक कपल आहे. फरहान अख्तर(Farhan Akhtar)आणि शिबानी दांडेकर(Shibani Danekar) गेल्या तीन वर्षांपासून एकमेकांना डेट करीत होते. तब्बल तीन वर्षांनंतर त्या दोघांनी लग्नबंधनात अडकण्याचा निर्णय घेतला. आणि खंडाळा येथील जावेद अख्तर यांच्या आलिशान फार्महाऊसवर लग्नगाठ बांधली. दोघांचं लग्न अगदी साध्या पद्धतीत,मोजक्याच निमंत्रितांच्या उपस्थितीत पार पडलं, पण तरीही ते थोडं वेगळ्या अंदाजात झालं म्हणून चर्चेतही आलं होतं.

फरहान-शिबानीनं ख्रिश्चन पद्धतीत लग्नगाठ बांधली पण तरीही त्यांनी एकमेकांना स्वतः लिहिलेली काही खास वचन दिली. ती वचनं त्यांनी सर्वांसमोर बोलून दाखवली. आणि त्यामुळेच त्यांचा लग्नसोहळा विशेष ठरला होता. त्यांच्या लग्नाला हृतिक रोशन,फराह खान जी फरहानची मावस बहिणही आहे ती देखील आवर्जून उपस्थित राहिली होती. मोजक्याच निमंत्रितांच्या उपस्थितीत साजऱ्या पडलेल्या यांच्या लग्नसोहळ्यानं सोशल मीडियावर मात्र चांगलीच पसंती मिळवली. त्यांच्या लग्नासंदर्भातल्या अनेक फोटोनी चाहत्यांची वाहवा मिळवली. त्यानंतर शिबानीचं मिसेस.अख्तर हे नवं इन्स्टाग्रामवरचं नाव चर्चेत आलं, तिच्या एका फोटोवरनं ती लग्नाआधीच प्रेग्नेंट असल्याची बातमी चर्चेत आली. या बातमीला शिबानीनं उत्तर देत शांत केलं पण आता पुन्हा तिच्या एका पोस्टमुळे गोंधळ उडाला आहे. काय आहे नेमकी ती पोस्ट?

फराह खान ही फरहानची मावस बहिण. म्हणजे फराहची आई मेनका आणि फरहानची आई हनी ईराणी या दोघी सख्ख्या बहिणी. त्यामुळे शिबानीनं फराह सोबतचा लग्नातला एक फोटो तिच्या इन्स्टाग्रामवर पोस्ट करत लिहिलं,''फरहानशी लग्न फक्त तु माझी नणंद होणार म्हणून केलंय...''आणि तिनं खूप असे फनी,हार्ट इमोजी पोस्ट केलेयत. आता सगळ्यांनाच माहिती आहे फरहानसारखीच फराहसुद्धा बॉलीवूडमधील यशस्वी दिग्दर्शिका,निर्माती आणि नृत्य दिग्दर्शिका देखील आहे. त्यामुळे सोशल मीडियावर शिबानीच्या पोस्टसंदर्भात मिश्र प्रतिक्रियांचे सूर उमटत आहेत. कोणी तिची ही पोस्ट हसण्यावारी नेली आहे तर कुणी उगाचच तिच्यातनं गंभीर अर्थ काढला आहे.