मालिका क्षेत्रातील लोकप्रिय अभिनेत्री म्हणून नावलौकिक मिळवलेल्या पल्लवी डे हिच्या नुकत्याच घडलेल्या आत्महत्येच्या घटनेमुळे संपूर्ण मालिका क्षेत्रावर शोककळा पसरली होती. दरम्यान, ही घटना ताजी असताना आता आणखी एक धक्कादायक बातमी समोर आली आहे. मालिका क्षेत्रातील मॉडेल-अभिनेत्री म्हणून प्रसिद्ध असणारी विदीशा मजुमदार हिचा मृतदेह तिच्या घरामध्ये आढळून आला आहे. 21 वर्षाची असणारी ही अभिनेत्री नागरबाजारजवळ एका अपार्टमेंटमध्ये तिच्या आई-वडिलांसोबत राहत होती.

काल (बुधवार) सायंकाळी या तरुण अभिनेत्रीचा मृतदेह तिच्या अपार्टमेंटमधील एका खोलीत लटकलेल्या अवस्थेत आढळून आला आहे. या धक्कादायक घटनेमुळे पुन्हा एकदा मालिका क्षेत्रावर दु:खाचा डोंगर कोसळला असल्याचे बोलले जात आहे. या घटनेसंदर्भात पोलिसांनी तपास सुरू केला असून अभिनेत्रीची हत्या झाली की आत्महत्या हे अजूनही स्पष्ट झालेलं नाही.

मिळालेल्या माहितीनुसार, पोलिस या घटनेसंदर्भातील तपास करत असून तिच्या जवळील सर्व मित्र-मैत्रिणींकडून आणि नातेवाईकांकडून अधिकची माहिती गोळा केली जात आहे. सध्या प्राथमिक अंदाजानुसार ही आत्महत्या असल्याचा संशय व्यक्त केला जात आहे. मात्र पोलिसांनी अजूनह कोणताही अंदाज व्यक्त केलेला नाही. पोस्टमार्टम अहवालानंतर सत्य काय हे समोर येईल असे पोलिसांनी सांगितले आहे.