KRK On Nushrratt Bharuccha:  सध्या जगभरात इस्त्राइल - पॅलेस्टाईन यांच्यात सुरू असलेल्या युद्धाने खळबळ उडाली आहे. हमासच्या दहशतवाद्यांनी इस्त्राइलवर मोठ्या प्रमाणात रॉकेट सोडले आहेत. इस्राइल आणि पॅलेस्टाईन यांच्यात सुरू असलेले युद्ध दिवसेंदिवस आणखी भयावह होताना दिसत आहे. आकडेवारीनुसार, या हिंसाचारामुळे इस्रायलमध्ये आतापर्यंत किमान 600 लोकांचा मृत्यू झाला आहे, तर 1590 लोक जखमी झाले आहेत.

मात्र यासगळ्यात एका बातमीनं बॉलीवूडच्या चाहत्यांचे लक्ष वेधुन घेतले ते म्हणजे बॉलिवूडची प्रसिद्ध अभिनेत्री नुसरत भरुचाने. ती इस्त्राईलमध्ये अडकून पडल्याची बातमी सोशल मीडियावर व्हायरल झाली होती. इस्त्राइल - पॅलेस्टाईनमध्ये सुरू असलेल्या युद्धात नुसरत इस्रायलमध्ये अडकली होती.

नुसरत हैफा इंटरनॅशनल फिल्म फेस्टिव्हलसाठी इस्राइलला गेली होती. मध्यरात्री तिच्या टीमने नुसरतसोबत संपर्क केला त्यानंतर तिच्याशी संपर्क तुटला. त्यानंतर इस्त्राईलमधील भारतीय दुतावासानं तिची मदत केली आहे.

रविवारी दुपारी तिला भारतात सुखरूप आणण्यात आले. भारतात परतल्यानंतर तिने मीडियाला प्रतिक्रिया देणं टाळलं आणि थेट घर गाठलं.आता कालच्या या संपूर्ण प्रकरणावर अभिनेता कमाल आर खान उर्फ ​​केआरकेने नुसरत भरुचा बाबत एक ट्विट शेयर केलं आणि तिच्यावर टीका करत निशाणा साधला आहे.

KRRK ने सोशल मीडिया प्लॅटफॉर्म X (पूर्वीचे ट्विटर) वर लिहिले, “नुसरत भरुचा शनिवारीच भारतात परतली होती . मात्र रविवारी सकाळी त्यांनी इस्राइलशी संपर्क तुटल्याची बातमी प्रसारित केली. एक तासानंतर त्यांनी माहिती दिली की ती सुरक्षित आहे आणि विमानात बसण्यासाठी विमानतळावर पोहोचली आहे. लगेच तासाभरानंतर तिने एक व्हिडीओ शेयर केला की ती मुंबईला पोहोचली आहे. आता ती किती मोठी नाटकी आणि निर्लज्ज आहे. याची तुम्ही कल्पना करू शकता."

अशा शब्दात केआरकेनं नुसरतवर टीका केली आणि तिने हे सर्व नाटक केल्याचं सांगितले. कमाल आर खान सोशल मीडियावर अनेकदा बॉलिवूड सेलिब्रिटींना टार्गेट करत असतो. आता त्याने नुसरतवर टीका केली. सध्या त्याचे ट्विट सोशल मीडियावर व्हायरल होत आहे.

तर दुसरीकडे नुसरत इस्रायलमधून भारतात सुखरूप पोहोचल्याचे बरेच व्हिडिओ सोशल मीडियावर व्हायरल होत आहे. व्हिडिओमध्ये ती एअरपोर्टमधून बाहेर पडताना दिसत आहे. यावेळी ती खुपच घाबरलेली दिसली. 'मी सध्या खूप अस्वस्थ आहे, मला घरी जाऊ द्या.' अशी प्रतिक्रिया नुसरतने दिली होती.