तृणमूल काँग्रेसच्या खासदार आणि बंगाली अभिनेत्री नुसरत जहाँ (Nusrat Jahan) नेहमीच त्यांच्या खासगी आयुष्यामुळे चर्चेत राहिल्या. नुकतंच त्यांनी बाळाला जन्म दिला असून मातृत्त्वाबद्दल आणि त्याच्या पित्याबद्दल त्या एका चॅट शोमध्ये मनमोकळेपणाने व्यक्त झाल्या. 'इश्क विथ नुसरत' या चॅट शोमध्ये त्यांनी स्पष्ट केलं की त्या एकट्या नाहीत. "माझा मुलगा यिशान याला इतरांप्रमाणेच सामान्य वडील आणि एक सामान्य आई आहे. मी प्रत्येक निर्णय अत्यंत समजुतदारपणे घेतला आहे," असं त्या म्हणाल्या.

इश्क एफएमने 'युट्यूब'वर शेअर केलेल्या या व्हिडीओमध्ये नुसरत यांना २०२१ मध्ये घेतलेल्या सर्वात धाडसी निर्णयाबाबत एका सोशल मीडिया युजरने प्रश्न विचारला. यावर नुसरत यांनी सांगितलं की मातृत्वाचा प्रवास हा सर्वात धाडसी निर्णय होता. "मी कोणतीही चूक केलेली नाही. हे माझं आयुष्य आहे आणि मी निर्णय घेतला आहे. लोकांना कदाचित तो धाडसी वाटेल पण मला वाटतं की हा निर्णय घेण्यासाठी मी खूप समजूतदार होते. मी याविषयी कधीही बोलले नाही जेणेकरून मला माझ्या निर्णयावर ठाम राहायचं होतं. फक्त मी या विषयावर बोलले नाही म्हणून, बर्‍याच लोकांनी माझ्यावर टीका केली. म्हणून आज मी याबद्दल बोलत आहे. होय, मी अत्यंत धैर्यवान आहे आणि मला माझ्या आई होण्याच्या निर्णयाचा खूप अभिमान आहे. मी एकटी आई नाही, माझ्या मुलाचे एक सामान्य वडील आणि माझ्यासारखी सामान्य आई आहे", असं त्या म्हणाल्या.

या चॅट शोमध्ये त्यांनी गरोदरपणात होणाऱ्या हार्मोनल चेजेंसबद्दलही सांगितलं. "घरातील एखादं रोपटं जरी सुकलं तरी मी रडायची. शरीरातील हार्मोनल बदलांमुळे मी विनाकारण रडायची आणि हसायची. कधी कधी मला पहाटे 3 वाजता केळी खायची इच्छा व्हायची. विशेष म्हणजे हे फळ मी आयुष्यात कधीही खाल्लं नव्हतं," असं त्या म्हणाल्या. काही दिवसांपूर्वी नुसरत यांनी सोशल मीडियावर एक फोटो पोस्ट केला होता. त्या फोटोवर अनेकांनी कमेंट करत नुसरत यांनी नाकाची सर्जरी केली का असा प्रश्न उपस्थित केला होता. त्यावरही त्यांनी नाकाची सर्जरी केली नसल्याचं स्पष्ट केलं.

नुसरत यांनी ऑगस्टमध्ये यिशानला जन्म दिला. अभिनेता यश दासगुप्ता हा यिशानचा पिता असल्याचं त्यांनी सांगितलं. २०१९ मध्ये त्यांनी तुर्कीमध्ये निखिल जैनशी लग्न केलं होतं. या वर्षी जूनमध्ये त्यांनी भारतीय कायद्यानुसार त्यांचं लग्न अवैध असल्याचं सांगितलं होतं.