Tollywood News: दाक्षिणात्य चित्रपटातील प्रसिद्ध अभिनेत्री रश्मिका मंदानाच्या (Rashmika Mandana) वाट्याला पुष्पानंतर मोठी लोकप्रियता आली. सध्या ती प्रसिद्धीच्या झोतात आहे. तिचं सामी आणि श्रीवल्ली गाणं सोशल मीडियावर (Saami Song) प्रचंड लोकप्रिय झाले आहे. अल्लु अर्जुनच्या पुष्पानं बॉक्स ऑफिसवर (Pushpa Box Office) कमाल केली आहे. रश्मिकाची वेगळी ओळख करुन द्यायची झाल्यास ती सध्याच्या घडीला दाक्षिणात्य चित्रपट विश्वातील आघाडीची अभिनेत्री आहे. पुष्पानंतर तिची गाडी सुसाट सुटली आहे. तिच्या आगामी चित्रपटांची प्रेक्षक आतुरतेनं वाट पाहत आहेत. तिनं एका मुलाखतीमध्ये धक्कादायक खुलासा केला आहे. त्यामध्ये आपण पहिल्याच चित्रपटानंतर ते क्षेत्र सोडण्याचा निर्णय घेतल्याचे रश्मिकानं सांगितलं आहे.

सध्या रश्मिकाकडे अनेक चित्रपटांची रांग लागली आहे. त्यामुळे येत्या काळात तिच्या प्रोजेक्टची उत्सुकता चाहत्यांना आहे. एका प्रसंगानंतर रश्मिकाच्या आयुष्यात बदल झाला. दाक्षिणात्य चित्रपटातील काही निर्माते आणि दिग्दर्शक यांच्याकडून आपल्याला अपमानस्पद वागणूक मिळाल्याचे रश्मिकानं सांगितलं आहे. एका मुलाखतीमध्ये तिनं सांगितलं की, मी टॉलीवूड कायमचे सोडणार होते. एवढा मानसिक त्रास मला झाला होता. माझ्या वडिलांनी मला त्यांचा बिझनेस पाहण्यासाठी सांगितले. एकीकडे मिळणारी अपमानास्पद वागणूक आणि दुसरीकडे घरुन बिझनेसच्या क्षेत्रात येण्यासाठी होणारा आग्रह यामुळे माझी मानसिकता काही काळ ढासळल्याचेही रश्मिकानं सांगितलं.

मी वयाच्या 19 व्या वर्षी काम सुरु केले होते. या वयात मुली त्यांचं आयुष्य इंजॉय करताना दिसतात. मी मात्र कामात होते. दिवसरात्र मेहनत करत होते. मला खूप धमाल करायची होती. मात्र त्यावेळी कामाच्या ओझ्यानं माझा तो आनंद हिरावून घेतला. ठीक आहे आता मला त्याचे वाईट वाटत नाही. आज मी जे काही आहे ते सगळ्या त्या दिवसांमधील कष्टाचे फळ असल्याची प्रतिक्रिया रश्मिकानं दिली आहे. तेव्हा मला वडिलांनी सांगितले होते की, एकच चित्रपट करायचा आणि पुन्हा ते क्षेत्र सोडून द्यायचे. त्यांचा हा निर्णय ऐकून मला तर धक्काच बसला होता. अशी आठवण रश्मिकानं यावेळी सांगितली.