Tunisha Sharma Death: बिग बॉस फेम सोफिया हयातने ही टीव्ही अभिनेत्री तुनिषा शर्माच्या दुःखद निधनाबद्दल आपले मत जाहिरपणे मांडले आहे. सोफियाने या प्रकरणात मालिकेच्या निर्मात्यांना दोष देत त्यांच्यावर आरोप करत काही प्रश्न निर्माण केले आहेत. (Tunisha Sharma Death Case Sofia Hayat blames makers)

टीव्ही अभिनेत्री तुनिषा शर्मा हीनं मालिकेच्या शुटिंग दरम्यान सेटवरच गळफास घेऊन आत्महत्या केल्याची घटना शनिवारी 24 डिसेंबर,2022 ला घडली. 20 वर्षीय अभिनेत्रीच्या मृत्यूची बातमी ऐकून सगळ्यांना हादरा बसला. सोफियाला खूप दु:ख झाले आणि टीव्ही शोच्या निर्मात्यांनी तरुण अभिनेत्रींना त्यांच्याहून जास्त वयाच्या पुरुषासोबत रोमान्स करण्यासाठी कास्ट केल्याबद्दल दोषी ठरवले आहे. तिला असे वाटते की तेच खरे गुन्हेगार आहेत आणि ते तरुण मुलींचा वापर सहज कशासाठीही करून घेतात.

सोफिया हयात म्हणाली, “ जेव्हा आपण तरुण कलाकारांच्या अयशस्वी नातेसंबंधांमुळे आत्महत्या केल्याच्या बातम्या वाचतो तेव्हा वाईट वाटते. या प्रकरणांमध्ये निर्मातेच दोषी आहेत असे मला वाटते. ते तरुण अभिनेत्रींना भूमिका तर देतात पण अगदी कोवळ्या वयात त्यांना त्यांच्याहून जास्त वयाच्या अभिनेत्यांसोबत कास्ट करतात आणि त्यांच्या प्रोजेक्टमध्ये ठासून रोमान्स भरतात''.

नुकतीच अभिनयाला सुरुवात केलेली आणि अनुभवी कलाकार नसलेली ही मुलं शूटिंगच्या वेळी सेटवर सहज स्वतःला झोकून देतात आणि अशावेळी वयानं मोठ्या पुरुषांशी लैंगिक संबंध ठेवतात आणि ते त्यांना पटवून देतात की इंडस्ट्रीमध्ये लैंगिक संबंध ठेवणे हे चुकीचं नाही आहे. अशातच तरूण मुली मग वाट चुकतात..असं देखील सोफिया म्हणाली.

ती पुढे म्हणाली की,''मी स्वतःही अशाच परिस्थितीतून गेली आहे कारण मला पण असे निर्माते माहित आहेत. या निर्मात्यांना अनुभवी कलाकार घेतले तर जास्त पैसे मोजावे लागतात आणि हे नवीन कलाकार कमी पैशात काम करतात आणि ते कोणत्याही गोष्टीला नकार देत नाही तर हेच शोच्या निर्मात्याला हवे असते. पुढे त्या कलाकारांचे काहीही होवो,यांना त्याची काहीही पडलेली नसते''.

''इतके सगळे होऊनही शोचे निर्माते गप्प का आहेत आणि त्यांच्याकडून या प्रकरणावर कोणतेही योग्य विधान का जाहीर केले गेले नाही? पैसा हेच फक्त त्यांचे ध्येय आहे का?, जसं आधीच्या कितीतरी घटना जशा दाबल्या गेल्या तसंच तुनिषाच्या केसबाबतीत होईल. पण मला वाटतं भविष्यात हे घडण्यापासून रोखण्यासाठी कलाकारांनी आताच काहीतरी केले पाहिजे''. सोफियाच्या या बेधडक वक्तव्यांमुळे टी.व्ही इंडस्ट्रीत मात्र खळबळ उडाली आहे.