vaibhav mangle: अभिनेते वैभव मांगले म्हणजे मराठी मनोरंजन विश्वातील एक दिग्गज नाव. मालिका नसो, नाटक किंवा चित्रपट त्यात वैभव मांगले असणार म्हणजे भूमिका चोख वाजणारच. म्हणूनच यांनी साकारलेला 'टाइमपास' मधील शाकाल अजूनही आपण विसरू शकलेलो नाही.

वैभव मांगले अजून एका गोष्टीसाठी ओळखले जातात ते म्हणजे, त्यांचा स्पष्टवक्तेपणा.. त्यांना जी बाब खटकते त्याविषयी ते अत्यंत परखडपणे भाष्य करतात. ते इकते फटकळ आहेत की अक्खी मराठी इंडस्ट्री त्यांना घाबरून असते.

ते वेळोवेळी खटकणाऱ्या गोष्टींवर सडेतोड भाष्य केले आहे. काही दिवसांपूर्वीच ते नाट्यगृहांच्या दुरवस्थेवर बोलले होते. अशा वैभव मांगले यांचा आज वाढदिवस आज ते आपला 47 वा वाढदिवस साजरा करत आहेत.

त्यानिमित्ताने जाणून घेऊया त्यांच्या आयुष्यातील एक खास बात.. की ज्यांना सगळे घाबरून असतात, असे वैभव मांगले नेमके घाबरतात तरी कुणाला..

(Vaibhav Mangale Birthday news actor fears to watch horror films)

वैभव मांगले यांनी आजवर अनेक भूमिका केल्या. त्यांचा टाइमपास चित्रपट असो की मालिकांमधील विनोदी काम.. त्यांनी कायमच प्रेक्षकांची मनं जिंकली. अगदी 'अलबत्या गलबत्या' नाटकातूनही त्यांनी चेटकीण बनून छोट्या दोस्तांना वेड लावले.

सध्या ते ‘झी मराठी’वरील ‘चंद्रविलास’ या मालिकेमध्येतर नरहरी पंत या 200 वर्षाच्या भुताची भूमिका करत आहेत. अत्यंत विचित्र असा अवतार या भूमिकेसाठी त्यांनी केला आहे. त्यांचे हे रूप पाहून सगळेच घाबरतात. साध्या ते स्वतः भुताची भूमिका करत असले तरी, तुम्हाला ऐकून आश्चर्य वाटेल पण त्यांना स्वतःला भुतांची प्रचंड भीती वाटते.

एका मुलाखतीत वैभव मांगले म्हणाले होते, ' मी भुताची भूमिका करत असलो तरी खऱ्या आयुष्यात मला भयपट अजिबात आवडत नाहीत, कारण मला त्याची खूप भीती वाटते. मी भूतांना खूप घाबरतो. त्यातील संगीताने मला खूप घाबरायला आणि दचकायला होतं.'

'त्यामुळे मी लहानपणी तर भयपट पाहिलेच नाहीत. पण अलीकडच्या काळातही भुताचा चित्रपट पाहिला नाही. भीती नैसर्गिक भावना आहे आणि माणूस जर घाबरला नसता तर तो जिवंतच राहू शकला नसता.' अशा भावना त्यांनी व्यक्त केल्या होत्या.