गेल्या काही दिवसांत नवीन संसदेच्या इमारतीवरील सेंट्रल विस्टा प्रकल्पा अंतर्गत उभारल्या गेलेल्या अशोक स्तंभावरनं वाद पेटला आहे. या नवीन अशोक स्तंभाच्या(Ashok Stambha) अनावरणावरुन विरोधकांनी मोदी सरकारवर(Modi Government) टोकाचे आरोप केले आहेत. केंद्र सरकारने जाणुनबुजून अशोक चक्रावर सिंहांना हिंसक दाखवत राष्ट्रीय चिन्हाचा अपमान केल्याचे विरोधकांचे म्हणणे आहे. अनेक राजकीय नेत्यांनी यावर टीकास्त्र सोडल्यानंतर आता 'द काश्मिर फाईल्सचे' दिग्दर्शक विवेक अग्निहोत्री(Vivek Agnihotri) यांनी या विरोधकांवरच निशाणा साधला आहे.(Vivek Agnihotri jumped in the controversy over Ashoka Pillar)

विवेक अग्निहोत्री यांनी या वादग्रस्त मुद्द्यावर प्रशांत भूषण यांचे ट्वीट शेअर करत लिहिलं आहे की,''शहरी नक्षलवाद्यांना दात नसलेला सिंह हवा आहे वाटतं,म्हणजे ते यांना पाळीव प्राण्यासारखं वापरु शकतील''. एका दुसऱ्या ट्वीटमध्ये विवेक यांनी पुन्हा विरोधकांवर शाब्दिक फैरी झाडत लिहिलं आहे की,''सेंट्रल विस्टा अतंर्गत उभारलेल्या नव्या राष्ट्रीय प्रतीकानं हे सिद्ध केलं आहे की शहरी नक्षलवाद्यांना केवळ अॅंगल बदलून मूर्ख बनवलं जाऊ शकतं. खासकरुन खालच्या अॅंगलने''.

माहितीसाठी इथे सांगतो की,सोमवारी ११ जुलै रोजी पंतप्रधान नरेंद्र मोदी यांनी सेंट्रल विस्टा प्रकल्पाअंतर्गत राष्ट्रीय प्रतीक असलेल्या अशोक स्तंभाचं अनावरण केलं. यादरम्यान लोकसभेचे स्पीकर ओम बिडला आणि राज्यसभेचे वरिष्ठ सभापतूी हरिवंश देखील उपस्थित होते. राष्ट्रीय प्रतीक हे सारनाथमधील सम्राट अशोकाच्या स्तंभाची प्रतिकृती आहे. यामध्ये चार सिंह वेगवेगळ्या दिशांना तोंड केलेले नजरेस पडत आहेत.