पूर्णा (जि.परभणी) : ‘कोरोना’चा प्रादुर्भाव रोखण्यासाठी सध्या लॉकडाउन करण्यात आले आहे. यामुळे खासगी रुग्णालये जवळपास बंद असून शासकीय रुग्णालयावरच सर्व भिस्त आहे. त्यात अपत्तीप्रसंगीही कोणी फोन घेण्यास तयार नाहीत. अशा परिस्थितीत गौर (ता.पूर्णा) येथे मंगळवारी (ता. १४) वीज पडून दोघेजण गंभीर जखमी झाले होते. त्यांना १०८ रुग्णवाहिकेमुळे वेळीच उपचार मिळाल्याने जीवदान मिळाले आहे. दरम्यान, बुधवारी (ता.१५) त्यांना रुग्णालयातून सुटी मिळाली आहे.

गौर (ता.पूर्णा, जि.परभणी) येथे मंगळवारी (ता.१४) पहाटे अचानक वातावणात बदल होऊन विजेचा कडकडाटांसह २० मिनिटे पाऊस झाला. दरम्यान, सचिन सदाशिव जोगदंड व संतोष दगडु जोगदंड हे काढलेल्या हळदीच्या ढगावर ताडपत्री झाकत असताना जवळच वीज कोसळली. त्यात दोघेही बेशुद्ध पडले. त्यांच्या शरीरावरील त्वचा व केस भाजल्याने गंभीर जखमी झाले.

लॉकडाउनमुळे खासगी वहान येणे शक्य नव्हते. या वेळी शाळा व्यवस्थापन समितीचे अध्यक्ष ज्ञानदेव जोगदंड यांनी १०८ नंबरवर फोन केला. दक्ष असलेल्या आरोग्य विभागाने रुग्णवाहिका पंधरा मिनिटांमध्ये घटनास्थळी पोचवून नांदेड येथील शासकीय रुग्णालयात सचिन जोगदंड व संतोष जोगदंड यांना पहाटे चार वाजता दाखल केले. त्यांच्यावर या ठिकाणी उपचार करण्यात आले. 

हेही वाचा - निमित्त लग्नाचे, बतावणी अंत्यसंस्काराची

आठ तासांनी ते दोघेही शुद्धीवर आले. त्यांची प्रकृती चांगली असल्याने त्यांना बुधवारी (ता. १५) रुग्णालयातून सुटी देण्यात आली. १०८ रुग्णवाहिका वेळीच आल्याने त्यांच्यावर उपचार झाले. त्यामुळे दोघांनाही जीवदान मिळाले.

हेही वाचा व पहा - Video: भुकेल्यांसाठी शिवभोजनाची थाळी ठरतेय तारक

अडचणीच्या प्रसंगी संपर्क करा
नैसर्गिक चक्र कोलमंडले आहे म्हणून वातावरणात बदल झाला तर शेतात काम रात्रीची जागल राखन करणाऱ्या शेतकरी व शेतमजुरांनी नैसर्गिक आपत्ती साप चावला, वीज कोसळली, गारा पडल्यामुळे जखमी झाले व अन्य इतर अडचणीच्या प्रसंगी तत्काळ १०८ नंबरवर फोन करावे, त्यामुळेच वेळेत दवाखान्यात दाखल करता येईल, असे अवाहन आरोग्य अधिकारी डॉ. एन. एन. देशमुख यांनी केले.
 

मला जीवदान मिळाले
मला जीवदान मिळाले ते पूर्णा आरोग्य विभागाच्या रुग्ण वाहिकेमुळे. नाहीतर कोरोनामुळे खासगी वाहन चालक फोन केला तरी फोन उचलत नाहीत.
- सचिन सदाशिव जोगदंड
जखमी रुग्ण, गौर