औरंगाबाद : औरंगाबाद, जालन्यातील तीन अवैध सावकारांवर कारवाई केली आहे. त्यांच्याकडून 89 दस्तऐवज ताब्यात घेतल्याची माहिती जिल्हा निबंधक अनिलकुमार दाबशेडे यांनी  दिली. 

जिल्हा उपनिबंधक दाबशेडे व जालना उपनिबंधक नानासाहेब चव्हाण यांच्या मार्गदर्शनाखाली ही कारवाई करण्यात आली आहे. दोन्ही कार्यालयाकडे सिल्लोड तालुक्‍यातील, तर जालना जिल्ह्यातील भोकरदन येथील एकूण तीन गैरअर्जदारांविरुद्ध सावकारीच्या तक्रारी आल्या होत्या. यावरून ही कारवाई करण्यात आली.

हे ही वाचा -  शाळांच्या अनुदानाची वाट मोकळी  

भोकरदन,सिल्लोड तालुक्‍यात कारवाई 

अर्जदार अबोली संजय तराळ (रा.पद्‌मावती, ता. भोकरदन) व रतन श्रीरंग शिब्रे (रा.टाकळी) यांनी गणेश शंकरराव वडगावकर व उमेश शंकरराव वडगावकर यांच्याविरुद्ध तक्रार दाखल केली होती. अर्जदार संजय सयाजी सपकाळ (रा.धावडा, ता. भोकरदन) यांनी गोकुळ लालचंद मंडावत (रा.खुपटा, ता. सिल्लोड) व भाऊसाहेब तेजराव काळे (रा.शिवना, ता. सिल्लोड) यांच्याविरुद्ध अवैध सावकारीची तक्रार दाखल केली होती. त्यानुसार अवैध सावकाराच्या राहत्या घरी, दुकान, गोदाममध्ये खरेदीखत, कच्चानोंदी असलेल्या वह्या व डायऱ्या, कोरे धनादेश, बॅंकेतून पैसे काढण्याच्या सह्या असलेल्या कोऱ्या स्लिप व जमिनीशी संबंधित कादगपत्रे असे महत्त्वपूर्ण दस्तऐवज जप्त केले.

वाचा कसा -  दहावी-बारावीच्या उत्तरपत्रिका तपासणीत हलगर्जीपणा  

89 दस्तऐवज जप्त

यासाठी भोकरदन तालुक्‍यातील पारध व धावडा येथे प्रत्येकी एक, सिल्लोड तालुक्‍यातील शिवना व खुपटा येथे दोन, तर औरंगाबाद शहरातील सिडको येथे एक अशा एकूण सात ठिकाणी झडती घेण्यात आली. यामध्ये एकूण 89 दस्तऐवज जप्त करण्यात आले. जप्त केलेल्या कागदपत्रांची तपासणी सुरू आहे.

पहा -  "परीक्षेला सामोरे जाताना...video  

 51 अधिकारी, कर्मचारी यांची कारवाई

पथकात एकूण 51 अधिकारी, कर्मचारी पंच व पोलिसांचा समावेश आहे. पथकप्रमुख भोकरदनचे सहायक निबंधक श्रीराम ए. सोन्ने, अंबडचे सहायक निबंधक पी. एच. बेरा, परतूरचे सहायक निबंधक पी. पी. वाघमारे, सिल्लोडचे ज्ञानेश्वर मातेरे, सोयगावचे बी. एस. मरमठ, सिल्लोडचे दीपक परेदशी, गंगापूरचे बी. एम. नवथर हे होते, असे दाबशेडे यांनी सांगितले.