छत्रपती संभाजीनगर - महापालिकेच्या रोजाबाग येथील उर्दू शाळेच्या खोलीत पहिल्या वर्गात शिक्षण घेणारी चिमुकली अडकून पडल्याची घटना सोमवारी (ता.२५) घडली होती. या घटनेची प्रशासनाने दखल घेतली असून, उपायुक्त नंदा गायकवाड, शिक्षणाधिकारी भारत तीनगोटे यांच्या पथकाने शाळेत जाऊन पालक आणि नागरिकांची मते जाणून घेतली. ही मुलगी वर्गात विसरलेला डबा आणण्यासाठी खोलीत गेली होती, असेही चौकशीत समोर आले आहे.

घटनेमुळे महापालिका शाळांमधील विद्यार्थ्यांच्या सुरक्षेचा प्रश्न समोर आला आहे. या घटनेची दखल घेत अधिकाऱ्यांचे पथक मंगळवारी सकाळी शाळेत दाखल झाले. शिक्षिका नर्गीस फातेमा यांच्यासोबत पथकाने चर्चा केली.

उम्मेखैर या चिमुकलीच्या पालकांना बोलावण्यात आले. तिच्या आईने यासंदर्भात कोणतीही तक्रार नसल्याचे सांगितले. चिमुकली सर्वांसोबत वर्गाबाहेर पडली. पण तिला जेवणाचा डबा वर्गात असल्याचे लक्षात येताच ती एकटीच आत गेली. तेवढ्या वेळात कुलूप लावण्यात आले, असे यावेळी पथकाला सांगण्यात आले.

अधिकाऱ्यांमार्फत चौकशी सुरू

या प्रकरणाची चौकशी सुरू करण्यात आली आहे. चौकशी अहवाल आल्यानंतर दोषींवर कारवाई प्रस्तावित केली जाईल. या घटनेतून महापालिकेच्या शाळांनी यापुढे खबरदारी घ्यावी अशी सूचना सर्व शिक्षक, शिपाई आणि वॉचमन यांना देण्यात आल्याचे प्रभारी शिक्षणाधिकारी भारत तीनगोटे यांनी सांगितले.