औरंगाबाद : कोरोना संसर्गाचे रुग्ण शहरात झपाट्याने वाढत असताना बुधवारी (ता. १२) तिसऱ्या लाटेतील संख्येचा विस्फोट झाला. चार हजार २४४ नागरिकांच्या चाचण्यांतून तब्बल ४१० पॉझिटिव्ह आढळून आल्यामुळे आरोग्य यंत्रणेला धक्का बसला आहे. तसेच रुग्णांचा पॉझिटिव्हिटी रेट दिवसेंदिवस वाढत आहे. बुधवारी हा रेट १९.७५ वर पोचला. त्यामुळे शहरवासीयांनो आता तरी सावध व्हा... असे म्हणण्याची वेळ आली आहे.

शहरात गेल्या काही दिवसांपासून कोरोना संसर्ग झपाट्याने वाढत आहे. त्यामुळे प्रशासनातर्फे कोरोना नियमांचे पालन करण्याचे आवाहन केले जात आहे. पण आजही अनेक जण रस्त्यावर विनामास्क फिरत आहेत. बाजारपेठेत मोठी गर्दी होत आहे. त्याचा परिणाम रुग्णसंख्येत दिवसेंदिवस वाढ होत आहे. गेल्या आठवड्यात रुग्णांचा आकडा शंभरपर्यत होता. मात्र चालू आठवड्यात दोन दिवस पावणेतीनशे जण पॉझिटिव्ह निघाले आहेत. बुधवारी तर कहर झाला पॉझिटिव्ह रुग्णांचा आकडा ४१० वर पोचला. दरम्यान, पॉझिटिव्हिटी रेट १९.७५ एवढा झाल्याने शहर ‘डेंजर झोन’मध्ये आले आहे. पॉझिटिव्ह रुग्णांमध्ये कोरोनाची लक्षणे सौम्य असल्यामुळे अनेक जण घरीच राहून उपचार घेत आहेत. महापालिकेने अद्याप कोविड केअर सेंटर सुरू केलेले नाहीत. जोपर्यंत रुग्णांना कोविड केअर सेंटरमध्ये दाखल करण्यासाठी डॉक्टरांकडून सूचना केली जात नाही, तोपर्यंत रुग्णाला कोविड सेंटरमध्ये भरती केले जाणार नाही, असे आरोग्य वैद्यकीय अधिकारी डॉ. पारस मंडलेचा यांनी सांगितले.

घरी उपचार घेण्यासाठी प्रमाणपत्र आवश्‍यक

होम आयसोलेशनमध्ये राहून उपचार घेण्यासाठी एमडी डॉक्टरांचे प्रमाणपत्र रुग्णांना अनिवार्य करण्यात आले आहे. त्यामुळे अनेकांची एमडी डॉक्टरकडून प्रमाणपत्र मिळविण्यासाठी धावाधाव सुरू आहे. महापालिकेने कोविड केअर सेंटर सुरू केले नाही तर दुसरीकडे एमडी डॉक्टरांचे प्रमाणपत्र लवकर मिळत नसल्याने नागरिकांची चिंता वाढली आहे.

पुन्हा तरुणच सर्वाधिक बाधित

कोरोना संसर्गाच्या पहिल्या व दुसऱ्या लाटेत पॉझिटिव्ह आलेल्यांमध्ये तरुणांची संख्या सर्वाधिक होती. आता तिसऱ्या लाटेतही सर्वाधिक बाधित तरुणच निघत आहेत. १८ ते ५० वयोगटातील ४१० जण पॉझिटिव्ह आहेत. त्यात २९० तरुण बाधित झाले आहेत. त्यापाठोपाठ ५० वर्षे वयोगटातील ७९ बाधित निघाले असून पाच ते १८ वयोगटातील ३५ जण बाधित आढळून आले आहेत. यामध्ये २५५ पुरुष असून १५५ महिलांचा समावेश आहे.