ओरंगाबाद : आडगाव सरक येथील शेतकऱ्याचा उच्चदाब वाहिनीच्या विद्युत खांबामध्ये विद्युत प्रवाह उतरल्याने मृत्यू झाला. या घटनेमुळे संतप्त झालेल्या कुटुंबीय आणि ग्रामस्थांनी मृतदेह हलवणार नाही अशी भूमिका घेतल्याने शनिवारी ( ता.नऊ) तणाव निर्माण झाला. आडगाव सरक येथील शेतकरी रुस्तुम माणिकराव पठाडे (वय ५२) हे २७ डिसेंबर रोजी शेतामध्ये शेळ्या चारण्यासाठी गेले होते. त्यावेळी अकरा केवी क्षमतेच्या विद्युत खांबाला स्पर्श झाला.
त्यांना विजेचा जबर धक्का बसल्याने ते खाली कोसळले. उपचारासाठी त्यांना खासगी रुग्णालयात दाखल करण्यात आले होते. हातामधील पेशी मृत झाल्याने त्यांना डावा हातही काढून टाकावा लागला होता. खासगी रुग्णालयात ३ ते ४ लाख रुपये खर्च झाल्यानंतर आर्थिक परिस्थिती बेताची असलेल्या पठाडे कुटुंबीयांनी रुस्तम यांना घाटी रुग्णालयात हलविले होते. उपचार सुरू असतांना आठ जानेवारी रोजी सायंकाळी साडेसहा वाजता त्यांचा मृत्यू झाला.
या घटनेमुळे संतप्त झालेल्या कुटुंबियांनी आणि ग्रामस्थांनी शनिवारी सकाळपासून घाटी रुग्णालयांमध्ये मोठी गर्दी केली होती. मृतदेह महावितरणच्या मुख्यालयात घेऊन जाणार अशी भूमिका कुटुंबियांनी घेतली होती. या घटनेच्या अनुषंगाने महावितरण'च्या मिल कॉर्नर येथील मुख्यालयासमोर प्रचंड पोलीस बंदोबस्त लावण्यात आला होता. घाटी रुग्णालयांमध्ये मोठी गर्दी झाल्याने तणाव निर्माण झाला होता.
पोलिसांनी कुटुंबियांची समजूत घालण्याचा प्रयत्न केला. पाच जणांच्या शिष्टमंडळ घेऊन महावितरण'च्या अधिकाऱ्यांशी बोलणी करून देण्याची भूमिका पोलिसांनी घेतली. दरम्यान पठाडे कुटुंबियातील दोघा जणांना महावितरणमध्ये सामावून घ्यावे तसेच दोषी असणाऱ्या अधिकारी आणि कर्मचाऱ्यांना निलंबित करावे, अशी मागणी कुटुंबियांनी लावून धरली. दुपारी उशिरापर्यंत पोलिस पठाडे कुटुंबियांची समजूत घालण्याचा प्रयत्न करत होते.
आडगाव सरक येथील घटनेबद्दल महावितरणला संवेदना आहेतच. या घटनेचा तपशील वार अहवाल विद्युत उपनिरीक्षककडे पाठविण्यात आलेला आहे. शवविच्छेदन अहवालानंतर भरपाई देण्याच्या संदर्भात महावितरण सकारात्मक पावले उचलेल.
- भुजंग खंदारे, मुख्य अभियंता, महावितरण
संपादन - गणेश पिटेकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.