औरंगाबाद : शहरासोबतच औद्योगिक वसाहतीत कोरोनाचा संसर्ग वाढत आहे. तो संसर्ग कमी करण्यासाठी औद्योगिक संघटनातर्फेही उपाययोजना केल्या जात आहेत. त्यामुळे कंपनीस्तरावर अँटीजेन टेस्ट करण्याचा प्रयत्न केला जात आहे. या टेस्टसाठी किती खर्च येणार, उपाययोजना कशी करावी, याविषयी उद्योग संघटनांतर्फे चर्चा करण्यात आली आहे. येत्या दोन ते तीन दिवसांत याबाबत निर्णय होणार असल्याची माहिती उद्योग संघटनांतर्फे देण्यात आली. 

वाळूज, शेंद्रा व चिकलठाणा येथील औद्योगिक वसाहतीमध्ये कोरोनाचा संसर्ग वाढू लागला आहे. तो कमी करण्यासाठी औद्योगिक संघटनांतर्फे जनजागृती व इतर उपाययोजना सुरू आहेत. १५ जुलै रोजी फिजिकल डिस्टन्स पाळत उद्योग संघटनांची बैठक झाली. तीत अँटीजेन टेस्ट कंपनी स्तरावर राबवता येईल का, यासाठी किती खर्च येईल, महापालिका व जिल्हा प्रशासनाची कशी मदत घेता येईल? या सर्व बाबींवर चर्चा करण्यात आली. 

हेही वाचा- बाजार समित्यांच्या निवडणुका सहा महिने पुढे ढकलल्या  

यात काही मोठ्या कंपन्यांतर्फे कर्मचाऱ्यांची टेस्ट केली जाणार असल्याची माहिती संघटनांतर्फे देण्यात आली; मात्र छोट्या कंपन्यांना महापालिका किंवा ईएसआय दवाखान्याच्या माध्यमातून ही टेस्ट करता येईल का, याचीही चाचपणी करण्यात येत आहे. याविषयी येत्या दोन दिवसांत निर्णय होणार असल्याचे उद्योग संघटनेतर्फे सांगण्यात आले. या बैठकीस सीएमआयए, मासिआ, सीआयआय या सर्व संघटनांनी सहभाग घेतला.

औरंगाबादच्या इतर बातम्या वाचण्यासाठी - क्लिक करा

सर्व औद्योगिक संघटनांनी कोरोनापासून बचाव करण्यासाठीच्या जनजागृतीसाठी स्वयंसेवक नेमले होते. हे स्वयंसेवक कर्मचाऱ्यांना कोरोनापासुन कसा बचाव करायचा, कशी काळजी घ्यायची या विषयी जागृत करण्याचे काम करणार आहे. याविषयी स्वयंसेवकांचे प्रशिक्षण पुर्ण झाले आहेत. लॉकडाऊन संपल्यावर स्वयंसेवक काम करणार आहे.