औरंगाबाद : जगभरात थैमान घालणाऱ्या कोरोना व्हायरसचा मुकाबला करण्यासाठी राज्यातली आरोग्य यंत्रणा आता चांगलीच वेगाने पावले उचलू लागली आहे. राज्यातील कोरोनाग्रस्तांचा आकडा आता सव्वाशेवर गेला असल्यामुळे कोरोनावर इलाज करण्यासाठी स्पेशल कोरोना हॉस्पिटल्स लागणार आहेत. 

औरंगाबाद इथं एक रुग्ण आढळला होता, तेव्हापासून इथेही मोठ्या प्रमाणात काळजी घेतली जात आहे. चिकलठाणा येथील जिल्हा सामान्य रुग्णालयामध्ये (मिनी घाटी) आता सोमवारपासून स्पेशल कोरोना हॉस्पिटल केले जाणार आहे. या संदर्भात जिल्हाधिकारी उदय चौधरी यांनी मिनी घाटीची पाहणी करून जिल्हा शल्यचिकित्सकांना तशा उपाययोजना तातडीने करण्याचे आदेश गुरुवारी दिले.

सोमवारपासून मिनी घाटीत कोरोना संशयित व बाधितांव्यतिरिक्त कोणालाही प्रवेश दिला जाणार नाही, असे जिल्हाशल्यचिकित्सक डॉ. सुंदर कुलकर्णी यांनी सांगितले.

औरंगाबादच्या इतर बातम्या वाचण्यासाठी - क्लिक करा

शहरातील बहुतांश भागातील खाजगी रुग्णालये बंद असल्यामुळे बदलत्या वातावरणामुळे होणाऱ्या आजारांवर उपचार कुठे करायचे, असा प्रश्न लोकांसमोर उपस्थित झाला आहे. तर रुग्णालये ही अत्यावश्यक सेवा असून शहरातील खाजगी रुग्णालयाने खुली राहू द्या, असे आवाहन आयएमएचे अध्यक्ष डॉ. सत्यनारायण सोमाणी यांनी केले आहे.

कोरोनामुळे सर्वत्र लाॅकडाऊन आहे. कोरोनाचा प्रादुर्भाव रोखण्यासाठी आरोग्य यंत्रणा सज्जपणे काम करीत आहेत. तर बदलत्या वातावरणामुळे घराघरात सध्या सर्दी, खोकलाचे रुग्ण आढळून येत आहेत. त्यात कोरोनाचे लक्षणे ही साध्या व्हायरलसारखीच असल्यामुळे लोक दक्षता म्हणून दवाखान्यात जाण्यासाठी बाहेर पडत आहेत.

मराठवाड्याच्या इतर बातम्या वाचण्यासाठी - क्लिक करा

मात्र, घराच्या आसपास असलेले खाजगी रुग्णालये बंद असल्यामुळे उपचारासाठी जायचे कुठे असा प्रश्न उपस्थितीत झाला आहे. तर सरकारी रुग्णालयात देखील मोठ्या प्रमाणात गर्दी आढळून येत आहे. त्यामुळे सरकारी रुग्णालयावर सर्वाधिक ताण पडत असून खाजगी डॉक्टरांनी आपले रुग्णालय सुरू ठेवावे, असे आवाहन आयएमएच्या वतीने करणयात आले आहे.

डॉ. साेमाणी यांनी सांगीतले की, बहूतांश भागात खाजगी दवाखाने सुरू आहेत. अत्यावश्यक सेवा देण्यासाठी सर्व डॉक्टर तयार आहेत. तर काही खाजगी रुग्णालयात काम करणारे कर्मचारी यांना जागोजागी पोलिस आडवित असल्याने काही डॉक्टरांनी रुग्णालये बंद ठेवली असतील.

महाराष्ट्रातील इतर बातम्या बाचण्यासाठी - क्लिक करा

मात्र, यासंदर्भात आयएमएच्या वतीने पोलिस आयुक्तांची भेट घेऊन खाजगी रुग्णालयात सेवा देणारे डॉक्टर्स व अन्य स्टाफला पासेस देण्याची व्यवस्था करावी अशी मागणी करणार आहोत. तरीही सर्व खाजगी डॉक्टर्सनी रुग्णालये सुरू ठेवावी. असे आवाहन राहील.