औरंगाबाद : जिल्हा परिषदेतील महिला सदस्यांसाठी राखीव असलेल्या जागेवर काही महिला पदाधिकारी तसेच वरिष्ठ अधिकाऱ्यांना ‘विश्वासात’ घेऊन आलिशान वातानुकूलित दालनातील त्या अधिकाऱ्याने अखेर तेथून काढता पाय घेतला. अति ‘ऍटिट्यूड’ दाखविणाऱ्या या अधिकाऱ्याने महिला सदस्यांच्या विश्राम ग्रहासाठी राखीव असलेल्या जागेवर डल्ला मारत दालन थाटले होते.

महिला भवनच्या जागेवर अधिकाऱ्याचे दालन

या विषयी ‘सकाळ’मध्ये शुक्रवारी (ता.२०) "महिला भवनच्या जागेवर अधिकाऱ्याचे दालन" या शीर्षकाखाली प्रकाशित झालेल्या वृत्तामुळे जिल्हा परिषदेच्या वर्तुळात खळबळ उडाली होती. एका महिला सभापतींनी आक्रमक पवित्रा घेतल्याने त्या अधिकाऱ्याला आपले बाड बिस्तार गुंडाळून घेण्याची वेळ आल्याची कुजबुज दिवसभर जिल्हा परिषदेत सुरु होती. 

मराठवाड्यातील अन्य बातम्या वाचण्यासाठी यावर क्लिक करा..!

ग्रामीण भागातून जिल्हा परिषदेत सभेसाठी अथवा सर्कल मधील विविध कामांसाठी येणाऱ्या महिला सदस्यांसाठी या ठिकाणी विश्रांतीगृह प्रस्तावित होते. परंतु चमकोगिरी करत वरिष्ठ अधिकारी व काही पदाधिकार्यांची मर्जी सांभाळण्याचा हातखंडा असलेल्या या अधिकाऱ्याने सदस्यांचा विरोध झुगारून या ठीकाणी स्वतः साठी आलिशान दालन तयार करून घेतले होते. जिल्हा परिषद अध्यक्षा तसेच दोन महिला सदस्य असूनही महिलांचेच अधिकार हिरावून घेतले जात असल्याच्या या प्रकाराला ‘सकाळ’ने वाचा फोडताच दालनासाठी संमती देणाऱ्यांच्या गोटात खळबळ उडाली होती. तसेच त्या अधिकाऱ्याला दालन त्वरित रिकामे करून पूर्वीच्या अति सामान्य विभागात बसण्याचे वरिष्ठानी सांगितल्याची माहिती अधिकृत सूत्रांनी दिली. दालनातील आलिशान खुर्ची तसेच दालनावरील नावाची पाटी त्या अधिकाऱ्याने काढून घेत दालन खाली केल्याचेही या सूत्रांनी सांगितले. 

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

दालनातील साहित्य निघेपर्यंत पाठपुरावा करणार : चव्हाण 
अधिकाऱ्याने दालनातील सर्व साहित्य रिकामे करून कक्ष खाली करावा प्रशासनाकडे पाठपुरावा सुरूच राहणार असल्याचे महिला व बाळ कल्याण समितीच्या सभापती अनुराधा चव्हाण यांनी "सकाळ" शी बोलतांना सांगितले. या प्रकाराला माझा पूर्वीपासूनच विरोध होता आणि राहणार. दालन रिकामे झाल्यानंतर महिला सदस्यांसाठीच त्याचा वापर केला जावा यासाठी मी स्वतः पुढाकार घेणार असल्याचेही त्यांनी स्पष्ट केले. 

(संपादन-प्रताप अवचार)