जेहूर (जि. औरंगाबाद) : येथील बसस्थानकासमोर मुख्य चौकात नीलेश संजय पवार यांचे किराणा दुकान आहे. या दुकानदाराने उधार समान दिले नसल्याने माथेफिरूंनी दुकानाला आग लावल्याची घटना बुधवारी (ता. १५) रात्री घडली. 

चार दिवसांपूर्वी पवार यांच्या दुकानात तीन अनोळखी व्यक्ती दारूच्या नशेत आल्या होत्या. त्यांनी उधार सामान मागितले. पण, पवार यांनी त्यांना नकार दिला. दरम्यान, उधार सामान देत नाही आता पाहून घेऊ, अशी धमकी पवार यांना त्या तिघांनी दिली. त्यानंतर बुधवारी त्यांनी पेटलेले टायर दुकानाजवळ टाकल्याने दुकानाला आग लागली. या आगीत संपूर्ण किराणा सामान जळून खाक झाल्याची घटना बुधवारी रात्री १० वाजेच्या सुमारास घडली. आगीत गोडतेल, डी फ्रिज, साखरेचे, शेगादाण्यांचे पोते, फर्निचर आदींसह लाखो रुपयांचे मोठे नुकसान झाले. 

मोठी बातमी - आता पत्रकारांच्या पाठीशी 'गुगल', उचललं 'हे' मोठं पाऊल...
 
अगोदर व्ययसाय ठप्प, त्यात आता नुकसान

कोरोनामुळे अगोदर २० दिवसांपासून व्यवसाय ठप्प आहे. त्यात आता या नव्या संकटामुळे पवार यांचे मोठे नुकसान झाले आहे. गावातील तरूणांनी आग आटोक्यात आणण्यासाठी भरपूर प्रयत्न केले. पण, दुकानात गोडतेल असल्याने आग राहून-राहून भडका घेत असल्याने आग आटोक्यात आणायला बराच वेळ लागला. आग आटोक्यात आली तेव्हा संपूर्ण दुकान जळून खाक झाले.
 

पोलिसांनी केला पंचनामा
तलाठी राम दुधभाते, देवगाव रंगारी पोलिस ठाण्याचे सहायक पोलिस निरीक्षक संजय अहिरे, पोलिस नाईक सुदाम साबळे, बीट जमादार बी. बी. खुळे, एस. एच. वाघ, पोलिस पाटील बाळू सावंत यांनी घटनास्थळी येऊन सदर घटनेचा पंचनामा केला. नीलेश पवार यांच्या फिर्यादीवरून अज्ञात व्यक्ती विरोधात देवगाव रंगारी पोलिस ठाण्यात गुन्हा दाखल केला आहे. अधिक तपास सहाय्यक पोलिस निरीक्षक संजय अहिरे यांच्या मार्गदर्शनाखाली पोलिस नाईक सुदाम साबळे, बी. बी. खुळे करीत आहे. तहसील प्रशाससनाने नीलेश पवार यांना त्यांना तत्काळ मदत करावी, अशी मागणी नागरिकांनी केली आहे.

मोठी बातमी - मंदीच्या काळात 'वर्क फ्रॉम होम' करायचंय ? मॉन्स्टरने लॉन्च केलं भन्नाट फिचर...