औरंगाबाद : महापालिकेत कोव्हॅक्सीनच्या (Covaxin vaccine)मोजक्याच लसींचा साठा शिल्लक असताना महापालिकेला बुधवार (ता.१९) १५ हजार ३६० डोसचा साठा मिळाला. त्यामुळे पंधरा ते अठरा वयोगटातील लसीकरणाची (Vaccination) मोहीमेला फायदा होईल. महापालिकेने शासनाकडे कोव्हॅक्सीनच्या(Covaxin vaccine) ७० हजार डोसची मागणी नोंदविलेली होती.

३ जानेवारीपासून १५ ते १८ या वयोगटातील मुलांच्या लसीकरणासही शासनाने परवानगी दिल्याने या वयोगटातील मुलांना कोव्हॅक्सीनचा डोस दिला जात आहे. मात्र, महापालिकेला सुरूवातीपासूनच कोविशिल्डच्या तुलनेत कोव्हॅक्सीनचा पुरवठा कमी प्रमाणात होत आलेला आहे. आताही महापालिकेकडे कोविशिल्ड लसींचा सत्तर हजार डोसचा साठा शिल्लक आहे. परंतु कोव्हॅक्सीनचे मात्र केवळ पाच हजार डोसच शिल्लक राहिले होते. महापालिकेने काही दिवसांपूर्वी कोव्हॅक्सीनच्या ७० हजार डोसची मागणी नोंदविलेली होती. परंतु शासनाकडून कालपर्यंत त्याचा पुरवठा झाला नव्हता.

त्यामुळे पंधरा ते अठरा या वयोगटातील मुलांच्या लसीकरणाची मोहीम संकटात सापडण्याची चिन्हे होती. मात्र, बुधवारी शासनाकडून महापालिकेला कोव्हॅक्सीनच्या १५ हजार ३६० डोचा पुरवठा झाला. सध्या शहरात १८ वर्षांवरील नागरिकांना प्रामुख्याने कोविशिल्ड लसच टोचली जात आहे. या लसीचे सुमारे ७० हजार डोस महापालिकेकडे उपलब्ध आहेत. तर कोव्हॅक्सीनचे आता १५ हजार डोस प्राप्त झाले आहेत.