कडा (जि.बीड) : आष्टी तालुक्यातील अनेक गावांमध्ये मुली तसेच महिलांच्या  छेडछाडीच्या  घटना दिवसेंदिवस वाढत आहे. आपली व आपल्या कुटुंबाची इज्जत जाईल या  भीतीपोटी कोणी पोलिस ठाण्यात तक्रार दाखल करत नसल्याने हिरोगीरी करणाऱ्या मजनूंची हिम्मत दिवसेंदिवस वाढत आहे.  रोजच्या छेडछाडीला कंटाळून आष्टी तालुक्यातील धामणगाव येथे एका विवाहितीने गळफास घेऊन आत्महत्या केल्याची घटना गुरुवारी (ता.११) घडली. या प्रकरणी अंभोरा पोलिस ठाण्यात बुधवारी (ता.२४) गुन्हा दाखल करून आरोपीस अटक केली असता न्यायालयाने दोन दिवसांची पोलिस कोठडी सुनावली आहे.

वाचा - आईवडिलांची परिस्थिती पाहवत नसल्याने वैशालीने उचले टोकाचे पाऊल, लग्नाचे स्वप्न राहिले अधूरे

आष्टी तालुक्यातील अंभोरा पोलिस ठाण्याअंतर्गत येणाऱ्या धामणगांव येथील विनोद साहेबराव घाटविसावे या तरुणाकडून घरा शेजारी राहणाऱ्या प्रदीप साळवे यांच्या कुटुंबातील मनीषा साळवे (वय २५) या विवाहितेची वारंवार छेड काढून त्रास देत होता. तसेच समाजात बदनामी करून  मानसिक त्रास देत होता. या नेहमीच्या त्रासाला कंटाळून व समाजात बदनामी होईल या भीतीने मनीषा साळवे या विवाहित तरुणीने गुरुवारी (ता.११) राहत्या घरी गळफास घेऊन आत्महत्या केली.

वाचा - संजना जाधव देणार माजी आमदार हर्षवर्धन जाधवांना टक्कर? सरपंच, उपसरपंचांच्या सत्काराला लावली हजेरी

या प्रकरणी मृत विवाहितेचा भाऊ विकास आबासाहेब मकासरे याच्या फिर्यादीवरून अंभोरा पोलिस ठाण्यात बुधवारी (ता.२४) सायंकाळी आत्महत्येस प्रवृत्त केल्याप्रकरणी विनोद साहेबराव घाटविसावे याच्याविरुद्ध गुन्हा दाखल केला. सदरील आरोपीस  अंभोरा पोलीसानी बुधवारी (ता.२४) अटक करून गुरुवारी (ता.२५) न्यायालयात हजर केले असता आरोपीस दोन दिवसांची पोलीस कोठडी सुनावली आहे. पुढील तपास पोलीस उपनिरीक्षक राहुल लोखंडे हे करित आहेत.

संपादन - गणेश पिटेकर