जालना - आम्ही ऊसतोड कामाला जातो,पण सध्या काम नाही..आमची मुलं या शाळेत शिकतात.. 
शाळेसाठी काहीतरी करावं,म्हणून आम्ही पैसे न घेता शाळेची साफसफाई केली आहे..ही प्रांजळ भावना आहे ,ऊसतोड कामगार कविता व गणेश राठोड यांची. 

श्रीरामतांडा ( ता. मंठा ) येथील जिल्हा परिषद प्राथमिक शाळेत सध्या शाळा पूर्वतयारी सुरू आहे. शाळेचे मुख्याध्यापक जगदीश कुडे यांना प्रश्न पडला की, शाळा परिसरात पडलेला कचरा,तुटलेली झाडे, स्वच्छतागृहासह घाण कशी साफ करावी. अशा विचारात असताना कविता व गणेश राठोड यांनी गुरुजींना विचारले, काय चालले आहे? या प्रश्नाचे उत्तर देताना शाळेच्या स्वच्छतेचे काम असल्याचे ते म्हणाले. हे,ऐकून क्षणाचा विलंब न करता शाळेची साफसफाई आम्ही करणार असे उत्तर कविता यांनी श्री. कुडे यांना दिले.

हेही वाचा : पीककर्जावर शेतकऱ्यांची मदार

दोन दिवसात शाळेची साफसफाई, तुटलेली झाडे व्यवस्थित करणे आणि स्वच्छतागृहांची स्वच्छता कविता व गणेश राठोड दाम्पत्याने श्रमदान करीत मोफत केली. या दोघांना शालेय समिती अध्यक्ष शिवाजी चव्हाण यांनीही मदत केली.  झाडांची तोडताड करण्याचे काम पांडुरंग चव्हाण यांनी विनामोबदला केले.

हेही वाचा : सकारात्मक राहा... हेही दिवस निघून जातील 

कविता व गणेश हे प्रतिकुल आर्थिक स्‍थिती असलेल्या कुटुंबातील आहे. उसतोडीच्या कामाला किंवा इतर कामाला हे जात असतात. सध्या कुठलेच काम त्यांना नाही. शाळेचे आपण काहीतरी देणे लागतो. आपण आर्थिक परिस्थिती अभावी शाळेला मदत करू शकत नाही, परंतु अशा पध्दतीने काम करून लेकरांची शाळा चांगली झाली पाहिजे म्हणून आम्ही हे काम केले असल्याचे कविता व गणेश राठोड यांनी सांगितले. 

दोन महिन्यापासून शाळा बंद आहे.सध्या खूपच घाण आणि अस्वच्छता झाली होती.आमच्या समोर प्रश्न होता,हे कसे करावे. पण कविता राठोड व गणेश राठोड यांनी कुठलाही मोबदला न घेता शाळेसाठी श्रमदान केले. 
- जगदीश कुडे, 
मुख्याध्यापक, श्रीरामतांडा