वैजापूर (जि.औरंगाबाद ) ः निवडणूक कामात हलगर्जीपणा करणाऱ्या अधिकाऱ्याविरुद्ध वैजापूर पोलिस ठाण्यात शुक्रवारी (ता.18) गुन्हा दाखल करण्यात आला आहे. एस. एम. मुंगीकर असे कामचुकार अधिकाऱ्याचे नाव आहे. शाखा अभियंता मुंगीकर (जिल्हा परिषद लघुपाटबंधारे उपविभाग) यांची स्थिर पथकप्रमुख म्हणून महालगाव येथे विधानसभा निवडणुकीच्या कामासाठी शुक्रवारी सकाळी 8 ते दुपारी 4 वाजेपर्यंत निवडणूक निर्णय अधिकाऱ्यांनी नियुक्ती केली होती.

मात्र, या वेळेत हा अधिकारी विनापरवानगी गैरहजर असल्याचे आढळून आल्याने निवडणूक निर्णय अधिकारी यांनी गुन्हा दाखल करण्याचे आदेश दिले. याप्रकरणी मंडळ अधिकारी सोमनाथ तोतला, विभाग वैजापूर यांनी दिलेल्या फिर्यादीवरून पोलिसात ठाण्यात गुन्हा दाखल करण्यात आला आहे.