परभणी ः जिल्ह्यात मुख्यमंत्री सौर कृषीपंपाचे काम प्रगतीपथावर असून पाच हजार ३२३ शेतकऱ्यांनी या योजनेतंर्गत अर्ज केले आहेत. दोन हजार २९६ शेतकऱ्यांनी पैसे भरले आहेत. त्यापैकी एक हजार दोन  शेतकऱ्यांची कामे प्रगतीपथावर असल्याची माहिती महावितणचे अधिक्षक अभियंता प्रवीण अन्नछत्रे यांनी ‘सकाळ’ शी बोलतांना दिली.

मुख्यमंत्री सौर कृषी पंप योजनेतंर्गत परभणी जिल्ह्यासाठी विशिष्ठ कोटा देण्यात आला आहे. सर्वसाधारण प्रवर्गातील अर्जदारांना तीन एचपी पंपाकरिता १६ हजार ५६० तर पाच एचपी पंपाकरिता २४ हजार ७१० रूपये भरावयाचे आहेत. 

हेही वाचा - खूशखबर...! अर्थसंकल्पात माहूर गडाच्या विकासासाठी निधीची तरतूद

प्रवर्गनिहाय अर्ज
परभणी जिल्ह्यात पाच हजार ३२३ शेतकऱ्यांनी महावितरण कंपनीकडे अर्ज केलेले आहेत. यात सर्वसाधारण कोट्यातून चार हजार ८१७, अनुसुचित जाती प्रवर्गातील ३७७, अनुसुचित जमाती प्रवर्गातील ६९ शेतकऱ्यांनी महावितरण कंपनीकडे अर्ज सादर केले आहेत असे श्री. अन्नछत्रे यांनी सांगितले. 

हेही वाचा - अर्थसंकल्पात मराठवाड्याला काय काय मिळाले, वाचा

दोन हजार ९९६ शेतकऱ्यांनी भरले पैसे 
अर्ज करणाऱ्या शेतकऱ्यांपैकी दोन हजार ९९६ शेतकऱ्यांनी कृषी सौरपंप योजनेसाठी पैसे भरले आहेत. यात सर्वसाधारण प्रवर्गातील दोन हजार ६७२ अनुसूचित जाती प्रवर्गातील २०५ तर अनुसुचित जमाती प्रवर्गातील ४९ शेतकऱ्यांचा समावेश आहे. सर्वसाधारण गटातील दोन हजार ६०९ शेतकऱ्यांनी त्यांच्या आवडीच्या कंपन्या निवडल्या आहेत. अनुसुचित जाती प्रवर्गातील २०१ तर अनुसुचित जमाती प्रवर्गातील ४९ शेतकऱ्यांनी अश्या प्रकारे कंपन्या निवडल्या आहेत.  

योजनेचा लाभ घेण्याचे आवाहन
शेतकऱ्यांनी मुख्यमंत्री सौर कृषी पंपा योजनसाठी मागणी सुरू केली आहे. इतर शेतकऱ्यांनी देखील तातडीने या संदर्भातील अर्ज महावितरणच्या कार्यालयात सादर करून या योजनेचा लाभ घ्यावा, असे आवाहन करण्यात आले आहे.

एक हजार दोन जणांची कामे सुरू
जिल्ह्यातील एक हजार दोन शेतकऱ्यांच्या शेतात सौर कृषी पंपाच्या उभारणीचे काम पूर्ण झाले आहे. उर्वरित शेतकऱ्यांना तातडीने सौर कृषी पंप बसविण्यासाठी महावितरण प्रयत्न करत आहे. शेतकऱ्यांनी या योजनेचा लाभ घ्यावा.  
- प्रवीण अन्नछत्रे, अधिक्षक अभियंता, महावितरण.