हिंगोली : नांदापूर (ता. कळमनुरी) येथील जिल्‍हा मध्यवर्ती बँकेत पंतप्रधान किसान योजना व पीकविम्याची रक्कम शेतकऱ्यांच्या बँक खात्यावर जमा झाली आहे. ही रक्‍कम उचलण्यासाठी शेतकरी गर्दी करीत आहेत. गर्दी वाढत असल्याने बॅंकेने गोल रिंगन आखून सोशल डिस्टंन्सचे पालन करत अनुदान गावनिहाय वाटप सुरू केले आहे.

नांदापूर येथील जिल्‍हा मध्यवर्ती बँकेला परिसरातील सोळा गावे जोडली आहेत. यात नांदापूरसह, हारवाडी, आमदरी, सोडेगाव, जामगव्हाण, कंजारा, महेशगव्हाण, पूर, राजदरी, रुपूर, रेणापूर, सालेगाव, सावंगी, सोनवाडी, टाकळगव्हाण, टेंभूरदरा या गावांचा समावेश आहे. 

हेही वाचा - हिंगोलीत ११२ जणांना पालिकेचा दणका...कशासाठी वाचा

अबकड या प्रमाणे याद्या

सध्या बँकेत पीकविमा व पंतप्रधान किसान योजनेची रक्‍कम शेतकऱ्यांच्या बँक खात्यात जमा झाली आहे. ती रक्‍कम घेण्यासाठी शेतकऱ्यांची बँकेत मोठी गर्दी होत आहे. यामुळे येथील बँक प्रशासनाने आता अबकड या प्रमाणे गावच्या याद्या तयार करून त्‍यांना वेळ व तारीख दिली असून त्‍याप्रमाणे लाभार्थींना अनुदानाचे वाटप केले जात आहे. 

बँक खात्यात रक्‍कम

दरम्यान, सोशल डिस्टन्सचे पालन करीत शेतकरी लाभार्थी बॅंकेने आखून दिलेल्या वर्तुळात उभे राहात आहेत. मात्र, रक्कम काढण्यात गर्दीमुळे वेळ लागत असल्याने आखलेल्या रिंगणात बसून गप्पा मारीत असल्याचे चित्र आहे. शेतकऱ्यांच्या बँक खात्यात रक्‍कम आल्याची माहिती मिळाल्यावर शेतकऱ्यांनी गर्दी केली होती. 

दोन ग्राहकांत एक मीटरचे अंतर

यासाठी शासनाने दिलेल्या नियमाचे पालन करीत त्‍याचे वाटप सुरू केले. दोन ग्राहकांत एक मीटरचे अंतर ठेवून गोल रिंगन तयार केले आहेत. तसेच गर्दी होणार नाही यासाठी अबकड प्रमाणे यादी तयार करून गावनिहाय वाटप करणे सुरू केल्याने गर्दीवर नियंत्रण आल्याचे शाखाधिकारी गणेश बोरकर यांनी सांगितले.

दोन बँकांच्या शाखाधिकाऱ्यांना नोटीस

वसमत : नियमाचे उल्‍लंघन केल्याप्रकरणी गुरुवारी (ता. २३) तहसीलदार ज्‍योती पवार यांनी येथील जिल्‍हा मध्यवर्ती बँक व भारतीय स्टेट बॅंकेच्या शाखाधिकाऱ्यांना नोटीस बजावली आहे.
कोरोना विषाणूच्या पार्श्वभूमीवर जिल्हाधिकारी यांच्या आदेशाप्रमाणे बँकांना सकाळी दहा ते दुपारी तीन वाजेपर्यत अर्थिक व्यवहार चालू करण्याबाबत आदेशीत केले आहे. 

येथे क्लिक करा- ऊसतोड कामगारांच्या धर्तीवर शेतमजुरांबाबत निर्णय घ्यावा: खासदार राजीव सातव

काटेकोर पालन होत नसल्याचे आढळले

परंतु, गुरुवारी दुपारी शहरातील विविध बॅंकांमध्ये तहसीलदार ज्योती पवार यांनी पाहणी केली असता काही ठिकाणी सूचनांचे काटेकोर पालन होत नसल्याचे आढळले. त्यामुळे अशा बॅंक अधिकाऱ्यांना सक्त सूचना देण्यात आल्या. तसेच जिल्‍हा मध्यवर्ती बॅंकेस भेट दिली असता बॅंकेमध्ये सामाजिक अंतर ठेवून बसण्यासाठी जागा उपलब्ध नसल्याने काही वयस्क महिला उन्हातच बसून होत्या.

बॅंक व्यवस्थापकास सूचना

 त्यामुळे तत्काळ बॅंक व्यवस्थापकास सूचना देऊन सावलीसाठी मंडप किंवा इतर उपाययोजना करण्याबाबत आदेशीत केले. तसेच जिल्हा बॅंकेच्या शाखाधिकारी व नांदेड रोडवरील भारतीय स्टेट बॅंकेच्या शाखेच्या शाखाधिकाऱ्यांनी नियमाचे पालन केले नसल्याने त्‍यांना नोटीस बजावण्यात आली असल्याची माहिती तहसीलदार ज्‍योती पवार यांनी दिली.