नांदेड : हिंगोली लोकसभा मतदारसंघाचे (Hingoli Lok Sabha Constituency) शिवसेनेचे खासदार हेमंत पाटील (Hemant Patil) मुख्यमंत्री एकनाथ शिंदे (Eknath Shinde) यांच्या गटात सामील झाले आहेत. त्यांच्या बंडखोरीनंतर जिल्ह्यात आता सर्वच पक्षांना विस्तारासाठी संधी निर्माण झालीय. त्यामुळं आता पक्षाचे नेते व स्थानिक पदाधिकारी काय भूमिका घेणार याकडं जिल्हावासीयांचं लक्ष लागलंय.

हिंगोली जिल्हा शिवसेनेचा (Hingoli Shiv Sena) बालेकिल्ला म्हणून ओळखला जातो. त्यामुळं हिंगोली लोकसभा मतदारसंघात बहुतांश वेळा शिवसेनेनं आपलं वर्चस्व सिद्ध केलंय. मात्र, विधानसभा मतदारसंघामध्ये कळमनुरीवर शिवसेनेची, वसमतवर राष्ट्रवादी तर हिंगोली विधानसभेवर भाजपची पकड आहे. त्यामुळं कुठल्याही पक्षाला मागील काळात जिह्यात विस्तार करता आला नाही. त्यातच आता शिवसेनेला एकीकडं बंडखोरीचं ग्रहण लागलेलं असताना आता यापूर्वी पक्षाला सोडून गेलेल्यांची घरवापसी देखील सुरू झालीय.

माजी खासदार आणि सध्या काॅंग्रेसमध्ये असलेले सुभाष वानखेडे (Subhash Wankhede) यांनी आज मुंबईत पक्षप्रमुख उद्धव ठाकरे (Uddhav Thackeray) यांच्या उपस्थितीत (Shivsena) शिवसेनेत प्रवेश केला. झालं-गेलं विसरून ठाकरे यांनी वानखेडे यांना पुन्हा शिवसेनेचा भगवा दिला. हिंगोलीचे खासदार हेमंत पाटील, कळमनुरीचे आमदार तथा जिल्हाप्रमुख संतोष बांगर यांनी शिंदे गटाला पाठिंबा दिल्यानं जिल्ह्यात शिवसेनेला मोठे खिंडार पडलं होतं. ही कमतरता भरून काढण्यासाठी तसेच पाटील, बांगर यांना टक्कर देऊ शकेल अशा नेत्याची शिवसेनेला गरज होती. वानखेडे यांच्या घरवापसीमुळं हे शक्य होऊ शकेल, असं बोललं जातंय.