हिंगोली : जिल्ह्यात वसमत व कळमनुरी तालुक्यातील काही गावांत मंगळवारी (ता.१२) सकाळी ६.४४ व ८.१८ वाजता भूगर्भातून दोन आवाज आल्याने जमीन हादरली. मात्र यामुळे कोणतीही हानी झाली नाही. याची कोणतीही नोंद झाली नाही. हा सौम्य धक्का असल्याचे जिल्हा आपत्ती व्यवस्थापनाच्या वतीने सांगण्यात आले. वसमत (Vasmat) तालुक्यातील पांगरा शिंदे, वापटी, कुपटी, खांबाळा, सिरळी व कळमनुरी (Kalamnuri) तालुक्यातील बोल्डा या पट्ट्यात असलेल्या गावात मंगळवारी सकाळी ६.४४ व त्यानंतर ८.१८ वाजता भूगर्भातून दोन आवाज झाले. यामुळे या गावातील गावकरी रस्त्यावर आले गावात कोठे काही झाले का याची माहिती घेत होते. (Hingoli Sound Come Out From Ground In Vasmat And Kalamnuri Taluka)

या आवाजाने कोणतेही नुकसान झाले नसल्याचे गावकरी भागवत शिंदे, गणेश खंडागळे, नागोराव जांबुतकर यांनी सांगितले. वसमत तालुक्यातील पांगरा शिंदे गावात मागच्या अनेक वर्षांपासून जमिनीतून गूढ आवाज येत आहेत. आतापर्यंत दीडशे ते दोनशे वेळा आवाज आले आहेत. दोन ते तीन वेळा या गावात आवाज आल्याने त्याची नोंद रिश्टर स्केलवर झाली होती. ते भूकंपाचे धक्के होते.

त्यांनतर परत भूगर्भातून आवाज येण्याची मालिका सुरुच आहे. मंगळवारी सकाळी दोन वेळा पांगरा शिंदे व या गावाच्या पट्ट्यात येणाऱ्या गावात भूगर्भातून आवाज आले. मात्र याची कोणतीही नोंद झाली नसल्याचे हिंगोली (Hingoli) जिल्हा आपती व्यवस्थापनाचे रोहित कंजे यांनी सांगितले. तसेच हा सौम्य धक्का असल्याचे ते म्हणाले. सतत होणाऱ्या आवाजाने गावकऱ्यांत भिती निर्माण झाली आहे.