नांदेड - अंदाजपत्रकात दिव्यांगांसाठी पाच टक्के निधीची तरतूद जिल्हाधिकारी तथा प्रभारी आयुक्त यांनी महापालिका अर्थसंकल्पात ठेवली नाही. त्यामुळे बेरोजगार दिव्यांगांकडून महापालिकेसमोर अर्थसंकल्पाच्या अंदाजपत्रकाची सोमवारी (ता. नऊ) होळी करण्यात आली.

महापालिकेच्या सर्वसाधारण सभेत जिल्हाधिकारी तथा प्रभारी आयुक्त डॉ. विपीन इटनकर यांच्याकडून २०२० - २०२१ चा सुधारित ६४५ कोटी ६४ लाख रुपयांचा अर्थसंकल्प स्थायी समितीकडे सादर करण्यात आला. या अर्थसंकल्पातील अंदाजपत्रकात विविध विकास कामांसाठी कोट्यवधी रूपयांची तरतूद ठेवण्यात आली. परंतु शासन निर्णयाप्रमाणे शहरातील दिव्यांगांच्या विविध कल्याणकारी योजनांसाठी पाच टक्के निधीची तरतुद  ठेवण्यात आली नाही. केवळ अंदाजीत तीन कोटी ४२ लाख रूपये तरतूद ठेवण्यात आली. जी की पाच टक्केप्रमाणे ३० कोटी ३४ लाख रूपये एवढे ठेवणे बंधनकारक होते. 

हेही वाचा -नांदेडला गुरुद्वारामध्ये होळी महोत्सव सुरु

निवेदन केले सादर
ही बाब जेव्हा बेरोजगार दिव्यांगांचे अध्यक्ष राहुल साळवे यांना वर्तमानपत्रातुन कळाली तेंव्हा त्यांनी निवेदन तयार केले. श्री. साळवे यांनी महापालिकेच्या २०२० - २०२१ च्या अर्थसंकल्पात दिव्यांगांसाठी शासन निर्णयानुसार पाच टक्के राखीव निधीची तरतूद करण्यात आली नसल्यामुळे जाहीर निषेध करत या अर्थसंकल्पाच्या प्रती महापालिका कार्यालयासमोर सोमवारी (ता. नऊ) जाळत होळी साजरी करून यावर बहिष्कार टाकत असल्याचे निवेदन आपल्या शिष्टमंडळांना घेऊन महानगरपालिका गाठली. परंतु शासकीय कर्मचाऱ्यांसाठी पाच दिवसाचा आठवडा झाल्यामुळे शनिवारी (ता. सात) कार्यालयात शुकशुकाट होता. 

हेही वाचलेच पाहिजे - मराठा आरक्षणासंदर्भात ‘या’ दोघांची सकारात्मक चर्चा

आयुक्तांना दिले निवेदन
दुसऱ्या दिवशी रवीवार असल्यामुळे सोमवारी (ता. नऊ) बेरोजगार दिव्यांग कल्याणकृती संघर्ष समितीद्वारे महापालिकेसमोर अर्थसंकल्पातील अंदाजपत्राच्या प्रती जाळून होळी करण्यात आली. यावेळी राहुल साळवे, संजय धुलधाणी, नागनाथ कामजळगे, सुनिल जाधव, अमरदीप गोधने, अब्दुल माजीद शेख चांद, कार्तिक भरतीपुरम, गजानन कावळे, प्रकाश नागोरे, दिलीप कांबळे, भोजराज शिंदे यांच्यासह इतर दिव्यांग सहभागी झाले होते. शेवटी जिल्हाधिकारी तथा प्रभारी आयुक्त डॉ. विपीन यांना दिव्यांग शिष्टमंडळाने निवेदन देऊन चर्चा केली.