जालना -  देशात कोरोनाचा लढा सुरू आहे. मात्र, जालन्यात यंत्रणा झोपा काढीत असल्याचे दिसून येत आहे. शहरातील जुना मोंढा परिसरात एक होम क्वारंटाइन रुग्ण शुक्रवारी (ता.तीन) आढळून आला. याची माहिती जिल्हा आरोग्य यंत्रणा, जिल्हा नियंत्रण कक्ष, पोलिस आणि रुग्णवाहिकेला देण्यात आली. मात्र घटनास्थळी केवळ पोलिस दाखल झाले. सकाळी नऊ ते दुपारी दोन वाजेपर्यंत जिल्हा आरोग्य यंत्रणा किंवा रुग्णवाहिका या व्यक्तीच्या मदतीला आलीच नाही. 

कोरोना विषाणूचा प्रसार रोखण्यासाठी लॉकडाऊन लागू केले आहे. कोरोनाचा विषाणूचा प्रसार होऊ नये म्हणून अनेकांची तपासणी करून होम क्वारंटाइनच्या सूचना दिल्या आहेत. मात्र, अनेक होम क्वारंटाइन रुग्ण मोकाट फिरत आहेत.

हेही वाचा : जालना जिल्ह्यात ३२ चेकपोस्ट

जालना शहरातील जुना मोंढा येथे औरंगाबाद जिल्ह्यातील खुलताबाद येथील एक होम क्वारंटाइन रुग्ण सकाळी नऊ वाजल्यापासून फिरत होता. त्याच्याकडे जालना जिल्हा सामान्य रुग्णालय येथे तपासणी झाल्याचे प्रमाणपत्र आहे. याची माहिती जुना मोंढा येथील एका किराणा दुकान चालकाने जिल्हा नियंत्रण कक्ष आणि जिल्हा आरोग्य यंत्रणा, पोलिस प्रशासन यांना कळविले.

हेही वाचा :  कोल्हापूरहून आलेल्या ऊसतोड मजूरांची तपासणी

दोन तासानंतर सदर बाजार पोलिस घटनास्थळी दाखल झाले. मात्र, जिल्हा आरोग्य यंत्रणा आणि रुग्णवाहिका दुपार उलटून गेली तरी या कोरोनाच्या होम क्वारंटाइन रुग्णांकडे फिरकले नाही. त्यामुळे सकाळी ११ वाजल्यापासून सदर बाजार पोलिस ठाण्याचे एक कर्मचारी ही ताटकळत बसले. 

सर्वांची टोलवाटोलवी 

या रुग्णांसंदर्भात जिल्हा शल्यचिकित्सक डॉ.मधुकर राठोड, पोलिस यंत्रणा, रुग्णवाहिका यांना कळविले. मात्र पोलिस घटनास्थळी दाखल झाले आणि रुग्णवाहिकेची वाट पाहत राहिले. मात्र इतर यंत्रणेने केवळ टोलवाटोलवी केले. त्यामुळे थेट जिल्हाधिकारी रवींद्र बिनवडे यांना या संदर्भात माहिती दिल्यानंतर दुपारी अडीच वाजता रुग्ण वाहिका दाखल झाली आणि त्या होम क्वारंटाइन रुग्णाला घेऊन गेली.