बदनापूर (जि.जालना) : बदनापूर पोलिसांच्या पथकाने नाकाबंदी करीत असताना एका मालवाहू वाहनातील देशीदारूचे शंभर बॉक्स जप्त केले आहे. या कारवाईत देशीदारूचा साठा आणि मालवाहू वाहन असा एकूण 4 लाख 49 हजार 600 रुपयांचा मुद्देमाल जप्त करण्यात आला आहे. ही कारवाई शनिवारी (ता.दहा) पहाटेच्या सुमारास करण्यात आली. दरम्यान, या प्रकरणी बदनापूर पोलिस ठाण्यात दोघा जणांविरुद्ध गुन्हा दाखल करण्यात आला आहे.  याबाबत पोलिसांनी दिलेली माहितीनुसार, बदनापूर पोलिसांच्या वतीने कोरोना प्रतिबंधक नियमांच्या अनुषंगाने कायदा व सुव्यवस्था राखण्यासाठी रात्री नाकाबंदी करण्यात येत आहे.

‘ब्रेक द चेन’मुळे कापड व्यवसाय संकटात, निर्बंधांमुळे लग्नसराईतील चैन संपली

शनिवारी बदनापूर पोलिसांचे पथक पोलिस ठाण्यासमोर नाकाबंदी करीत असताना संशयित मालवाहू वाहन थांबवून त्याची तपासणी केली. या वाहनात ठेवलेले देशीदारूचे तब्बल शंभर बॉक्स ज्याची बाजारात किंमत 2 लाख 49 हजार रुपये व 2 लाख रुपये किंमतीचे वाहन असे एकूण 4 लाख 49 हजार 600 रुपयांचा मुद्देमाल जप्त करण्यात आला. तसेच अवैधरित्या दारूच्या साठ्याची वाहतूक करणाऱ्या संशयित राहुल किसन वाढेकर (रा. ढोरपूरा रामनगर, जालना) व मंगेश देविदास नाईक (रा. रामनगर पोलिस कॉलनी, जालना) यांना ताब्यात घेतले. दरम्यान, या प्रकरणी सहायक फौजदार निवृत्ती शेळके यांच्या तक्रारीवरून त्या दोघा जणांविरुद्ध बदनापूर पोलिसांत गुन्हा दाखल करण्यात आला आहे.

Corona Updates: मराठवाड्यात कोरोनाचे सहा हजार ६५६ रुग्णांची भर, सात जिल्ह्यांत ८३ जणांचा मृत्यू 

अधिक तपास पोलिस निरीक्षक मारुती खेडकर करीत आहेत. ही कारवाई जिल्हा पोलिस अधीक्षक विनायक देशमुख, अप्पर पोलिस अधीक्षक विक्रांत देशमुख, पोलिस उपविभागीय अधिकारी सुधीर खिरडकर, पोलिस निरीक्षक श्री. खेडकर यांच्या मार्गदर्शनाखाली सहाय्यक पोलिस निरीक्षक नित्यानंद उबाळे, सहाय्यक फौजदार निवृत्ती शेळके, पोलिस मुख्य जमादार श्री. बुनगे, चालक दुर्गेश राठोड, गृहरक्षक दलाचे जवान श्री. पवार, श्री. गाडेकर, श्री. शिंदे, शेख नबी आदींच्या पथकाने केली.
कोट
 

संपादन - गणेश पिटेकर