भोकरदन (जि.जालना) : भोकरदन येथून रात्रपाळीचे काम आटोपून सकाळी घराकडे निघालेल्या तरुणावर काळाने घाला घातला. घर अवघ्या काही अंतरावरच असतानाच दुचाकी अपघातात तरुणाचा जागीच मृत्यू झाल्याने सर्वत्र हळहळ व्यक्त करण्यात येत आहे. ही घटना (ता.३१) रविवारी सकाळी ११ वाजेच्या सुमारास भोकरदन पारध मुख्य रस्त्यावरील सुरंगळी पाटीजवळ घडली. बालाजी समाधान बावस्कर (वय २९, रा.देहेड, ता.भोकरदन) असे या अपघातात ठार झालेल्या तरुणाचे नाव आहे.

सिडको बसस्थानक नव्हे हे तर अपघाताचे 'हॉटस्पॉट'... बसच्या धडकेत दिव्यांग गंभीर

मिळालेल्या माहितीनुसार तालुक्यातील देहेड येथील बालाजी बावस्कर हा तरुण भोकरदन शहरातील औटी पेट्रोलपंप येथे कामावर आहे. शनिवारी (ता.३०) त्याची रात्र पाळी असल्याने तो रविवारी (ता.३१) सकाळी ड्युटी करून साडेदहा वाजेच्या सुमारास देहेड गावी दुचाकीने घराकडे जात होता. यादरम्यान तालुक्यातील मनापूर येथील सुधाकर संपत दळवी (वय ५५) व माणिक संपत दळवी (वय ४५) हे दोघे भाऊ दुचाकीने देहेड येथून एका अंत्यसंस्काराच्या कार्यक्रमाहून भोकरदनकडे परतत असताना भोकरदन पारध मुख्य रस्त्यावरील सुरंगळी पाटीजवळ दोनही दुचाकीत समोरासमोर जोराची धडक झाली.

मराठवाड्याच्या ताज्या बातम्या वाचा

या अपघातात बालाजी बावस्कर या तरुणाच्या डोक्याला गंभीर मार लागल्याने त्याचा जागीच मृत्यू झाला तर सुखदेव संपत दळवी व माणिक संपत दळवी हे गंभीर जखमी झाल्याने त्यांच्यावर सिल्लोड येथील खासगी रुग्णालयात उपचार करून पुढील उपचारासाठी औरंगाबाद येथे हलविण्यात आल्याचे नातेवाईकांनी सांगितले. या घटनेतील मृत तरुण बालाजी बावस्कर याच्यावर भोकरदन ग्रामीण रुग्णालयात उत्तरीय तपासणी करण्याची प्रक्रिया सुरू होती. या घटनेने देहेड गावावर शोककळा पसरली आहे. या प्रकरणी भोकरदन पोलिसांकडून पंचनामा करून अपघाताची नोंद घेण्याची प्रक्रिया सुरू होती.

संपादन - गणेश पिटेकर