शहागड (जि.जालना) : शहागड-पैठण राज्यमार्गावर (बगळेगाव, ता.अंबड) शिवारात ट्रकने दोन बैलगाड्यांना धडक दिल्याने दोन बैलांचा जागीच मृत्यू झाला. तर दोन बैलांसह एक मजुर  जखमी झाला आहे. कर्मयोगी अंकुशराव टोपे समर्थ सहकारी साखर कारखान्याची ऊसतोड सुरू आहे. त्यामुळे परिसरात अनेक ऊसाच्या बैलगाड्यांचा वावर आहे. शुक्रवारी (ता.१२) शहागड-पैठण राज्यमार्गावरील बळेगाव पाटी (ता.अंबड) येथे ट्रक चालकाचा ट्रकवरील ताबा सुटल्याने दोन बैलगाड्यांना जोराची धडक दिली. यामध्ये तर दोन-दोन बैलांसह एक मजुर ही जखमी झाला आहे.

या घटनेची माहिती मिळाल्यानंतर समर्थ सहकारी साखर कारखान्याचे विठ्ठलराव झिंजुर्डे, सुरक्षा विभागाचे श्री. ढाकणे, मुकादम सखाराम घाडगे, सुनील नरवडे, साबू शेख यांनी घटनास्थळी दाखल होत. जखमी मजूर कर्मयोगी अंकुशराव टोपे समर्थ सहकारी साखर कारखान्याच्या रूग्णवाहिकेतून गेवराईमधील उपचारासाठी दाखल केले.

दरम्यान शहागड पोलिस चौकीचे पोलिस उपनिरीक्षक हनुमंत वारे व कर्मचाऱ्यांनी घटनेचा पंचनामा केला. दरम्यान अपघातस्थळी जखमी बैलावर उपचार व मृत बैलाचे उत्तरीय तपासणीसाठी पशुधन विकास अधिकारी डॉक्टर योगेश अक्षय, डॉक्टर एस.डी. औटे, डॉ.श्री.नाटकर, पशुधन पर्यवेक्षक हिरडपुरी यांनी केले. दरम्यान या प्रकरणी शहागड पोलिस चौकीत ट्रक चालकाविरोधात गुन्हा दाखल करण्यात आला आहे.

संपादन - गणेश पिटेकर