उदगीर (जि.लातूर) : येथील कोरोना रुग्णालयात गेल्या चोवीस तासात आठ जणांचा कोरोनाने मृत्यू झाला आहे. उदगीरासह परिसरात खळबळ उडाली आहे. दिवसेंदिवस कोरोनाचा संसर्ग झपाट्याने वाढत असल्याने नागरिकात चिंतेचे वातावरण निर्माण झाले आहे.  येथील कोरोना रुग्णालयात गुरुवारी (ता.आठ) कोरोनाचा उपचार घेत असलेल्या मित्र नगरमधील एका ६४ वर्षीय व्यक्तीचा दुपारी अडीच वाजता मृत्यू झाला. रात्री साडेसात वाजता गुडसूर (ता.उदगीर) येथील ८५ वर्षीय व्यक्तीचा मृत्यू झाला. शुक्रवारी (ता.नऊ) सकाळी सव्वा सहा वाजता हंडरगुळी (ता.उदगीर) येथील ८० वर्षीय पुरुषाचा, तर आठ वाजून दहा मिनिटाला ५० वर्षीय महिलेचा मृत्यू झाला आहे. हंडरगुळी येथील हे एकाच घरातील सासरा व सुन असल्याची माहिती मिळाली आहे.

'रेमडीसिव्हीर'साठी पुण्याहून लातूरच्या अधिकाऱ्यांना फोन, मोबाईल क्रमांक व्हायरल होताच औषधांच्या मागणीसाठी हजारो कॉल

दुपारी येथील धन्वंतरी आयुर्वेदिक वैद्यकीय महाविद्यालय येथे रावणकोळा येथील ५६ वर्षीय महिलेचा अशा पाच जणांचा कोरोनाने मृत्यू झाला. घोणसी (ता.जळकोट) येथील एका पन्नास वर्षीय व्यक्तीचा, बावलगाव (ता.औराद, कर्नाटक) येथील साठ वर्षीय व्यक्तीचा, रावणकोळा (ता.मुखेड) येथील ५५ वर्षीय व्यक्ती अशा तिघांचा सारी सदृश्य, तर पाच कोरोनाने अशा एकूण आठ जणांचा मृत्यू चोवीस तासात झाला असल्याची माहिती कोरोना रुग्णालयाचे नोडल अधिकारी डॉ. शशिकांत देशपांडे यांनी दिली आहे. सध्या शहर व परिसरात दिवसेंदिवस कोरोना संसर्गाचा झपाट्याने वेग वाढत आहे.

गाळे बांधण्यास विरोध करत ग्रामसेवकावर प्राणघातक हल्ला, औरंगाबाद जिल्ह्यातील घटना

मिनी लॉकडाऊन व शासनाने घातलेल्या कडक निर्बंधांचे पालन काही प्रमाणात होत नसल्याची स्थिती आहे. सातत्याने या परिस्थितीवर प्रशासन लक्ष ठेवून आहे. मात्र नियम तोडून अनेक ठिकाणी गर्दीची परिस्थिती निर्माण होत आहे. सध्या समूह संसर्गाला सुरुवात झाली की काय अशी परिस्थिती शहर व परिसरात निर्माण झाली आहे. अख्खे कुटुंब कोरोना बाधित होत असल्याने उदगीरकरांच्या चिंतेत भर पडली  आहे.